ԱԺ- ում այսօր Ալեքսան Հարությունյանը ներկայացնում էր Հանրային հեռուստառադիոընկերության 2010 թվականի գործունեությունը:
Նա նշեց, որ ֆինանսատնտեսական ճգնաժամի հետևանքով 2009 թվականին Հանրային հեռուստառադիոընկերությանը պետբյուջեի կողմից տրամադրվելիք գումարները 463 միլիոն դրամով կրճատվել են, սակայն 2010 թվականին ֆինանսական ճգնաժամը ամբողջությամբ հաղթահարվել է:
Ալեքսան Հարությունյանը նշեց նաև, որ ծրագիրը մամուլում հրապարակվել է, ուստի պատրաստակամություն հայտնեց պատասխանել պատգամավորների հարցերին:
ՀՀԿ պատգամավոր Կարինե Աճեմյանը հետաքրքրվեց եթերից զրկված «Արարատ» հեռուստաալիքի աշխատակիցների ճակատագրով, ինչպես նաև հիշեցրեց Սերժ Սարգսյանի հանձնարարականը, որ տվյալ հեռուստաալիքի աշխատակիցներից ոչ ոք չկրճատվի: Ալեքսան Հարությունյանը պատասխանեց, որ «Արարատ» հեռուստաալիքի կապուղին ոչ ոքի չի տրամադրվել, և օրենքով նախատեսվել է «Արարատ» հեռուստաալիքի փոխարեն հոգևոր, մշակութային ալիք ստեղծել, իսկ «Արարատ» հեռուստաալիքից ոչ ոք չի կրճատվի:
«Ժառանգություն» խմբակցության պատգամավոր Անահիտ Բախշյանը ևս հարց ուղղեց Ալեքսան Հարությունյանին, որ ԱԺ-ում աշակերտների և ուսուցիչների համար նախատեսված բաց դռների ժամանակ աշակերտները Հովիկ Աբրահամյանից հետաքրքրվել են, թե Հանրային հեռուստատեսությունը ե՞րբ է անդրադառնալու այդ տարիքի երեխաներին հուզող խնդիրներին։
Անահիտ Բախշյանը նաև հարցրեց, թե ինչո՞ւ հեռուստաընկերությունը օպերատիվ չի անդրադառնում մեր երկրի իրադարձություններին՝ հիշեցնելով Գագիկ Բեգլարյանի և ԴԱՀԿ-ի պետ Միհրան Պողոսյանի դեպքերը, վերջինիս դեպքում Միհրան Պողոսյանը չպատժվեց, սակայն այն նախարարը, որը ուշ էր զեկուցել այդ մասին, աշխատանքից հեռացվեց:
«Ինչ վերաբերում է երեխաների համար հաղորդումներին՝ համաձայն եմ, որ դրանք բավականին քիչ են, արդեն երկրորդ անգամ է՝ այս ամբիոնից խոսում ենք այս թեմայով։ Խոստովանում եմ, որ դրական տեղաշարժ չկա, բայց խոստանում եմ ԱԺ պատգամավորներին, որ մոտ ապագայում երեխաների համար նման հաղորդումներ կանենք։
Ինչ վերաբերում է երկրում կատարվող իրադարձություններին օպերատիվ չարձագանքելուն՝ ասեմ, որ չհաստատված տվյալներ հաղորդելը վտանգավոր հետևանքներ է ունենում: Թերթերում դրանք դատական քաշքշուկների պատճառ են դառնում: Այս հարցում մենք մի փոքր ավելի զգուշավոր ենք»,- պատասխանեց Ալեքսան Հարությունյանը, ինչից հետո Անահիտ Բախշյանը արձագանքեց, թե այդ հարցում Հարությունյանը մտահոգվելու կարիք չունի, քանի որ նրան երբեք դատի չեն տա:
Անահիտ Բախշյանը ևս մեկ անգամ հիշեցրեց Գագիկ Բեգլարյանի դեպքի հետ կապված պատժվածներին և անպատիժ մնացածներին, որից հետո Հովիկ Աբրահամյանը միջամտեց ու ասաց, որ տիկին Բախշյանը փորձում է բոլորի փոխարեն որոշում կայացնել:
Տևական ժամանակ Ալեքսան Հարությունյանը չէր արձագանքում Բախշյանի հարցադրմանը, ուստի Հովիկ Աբրահամյանը ստիպված եղավ Ա. Հարությունյանից հետաքրքրվել՝ պատասխանելո՞ւ է նա Անահիտ Բախշյանի հարցին, և զավեշտալի դրվագ տեղի ունեցավ:
Հավանաբար, Ալեքսան Հարությունյանին թվացել էր, որ ինքը ոչ թե ԱԺ-ում է, այլ հեռախոսով է ինչ-որ մեկի հետ զրուցում, և ԱԺ ամբիոնից մի քանի անգամ կրկնեց՝ «ալո, ալո»։
«Այդ դեպքերին անդրադարձել ենք մամուլում, և մինչև դատական որոշումներ չլինեն, պատշաճ եզրակացությունը չլինի տեղին, ճիշտ չեմ համարում այդ ամենին անդրադառնալը»,- ալոներից հետո պատասխանեց Ալեքսան Հարությունյանը:
