Ինչպես գրում է թուրքական Hurriyet օրաթերթը, Թուրքիայի պետական խորհուրդը որոշում է կայացրել մերժել հայկական համայնքի ներկայացուցչների այն դիմումը, որով նրանք խնդրում էին թույլատրել նոր պատրիարքի ընտրությունների անցկացումը:
Իր որոշման մեջ բարձրագույն դատական ատյանը նշել է, որ այս խնդիրն իր իրավասության ներքո չէ:
Հիշեցնենք, որ հայ համայնքի աշխարհիկ ներկայացուցիչներից կազմված հանձնաժողովը քննարկման է հանել այն հարցը, թե ով պետք է փոխարինի ծանր հիվանդ պատրիարք Մեսրոպ Բ Մութաֆյանին: Նրանք ցանկանում են չեղյալ համարել Ստամբուլի նահանգապետի կայացրած որոշումը, համաձայն որի՝ արքեպիսկոպոս Արամ Աթեշյանը դարձել էր «պատրիարքի տեղապահ», որի իրավասությունները տարածվում են ողջ պատրիարքությունում: Այս շարժումը, որին աջակցում է նաև Թուրքիայի ներքին գործերի նախարարությունը, համայնքը բաժանել է երկու մասի:
Խոսելով Hurriyet-ի հետ, Աթեշյանն ասել է, որ նոր պատրիարքի ընտրություններ չեն լինի, քանի դեռ Մեսրոպ Բ-ն կենդանի է: «Սա Հայ Առաքելական եկեղեցու օրենքն է,- ասել է նա:- Ես այս պաշտոնը ժամանակավորապես եմ զբաղեցնում»: Նա նաև նշել է, որ այդ նախաձեռնությունը թուլացնում է պատրիարքությունը, և որ անհրաժեշտ է համբերություն ունենալ:
