ՀՀ մշակույթի նախարարությունը երկրում մշակութային քաղաքականությունն իրականացնող կառույցն է, սակայն, ինչպես երևում է, մշակութային քաղաքականության սահմաններում չի երևում, թե նախարարությանը հուզում է ՀՀ մարզերի մշակութային կենտրոնների վիճակը:
ՀՀ մշակույթի նախարարության հասարակայնության հետ կապերի վարչության պետ Գայանե Դուրգարյանը «Առաջին լրատվականի» հետ զրույցում նշեց, որ մշակույթի նախարարության ենթակայության տակ գտնվում է միայն Ստեփանավանի մշակույթի կենտրոնը, իսկ մարզային գրադարանները և մյուս բոլոր մշակութային օջախները որոշ չափով գտնվում են մարզպետարանների,- որովհետև նրանք են, ի վերջո, որոշում դրանց թիվը քաղաքում,- իսկ հիմնական մասով՝ համայնքների իրավասության ներքո, և համայնքներն իրենք են որոշում դրանց ճակատագիրը:
Թեև այս խնդիրները հատուկ են հանրապետության շատ ու շատ քաղաքների ու գյուղերի, կառավարությունից այդպես էլ որևէ կոնկրետ անդրադարձ չի լինում սրանց:
Այնպես որ՝ «Եթե համայնքը փակում է ու չի կարևորում մշակույթի կենտրոնի գոյությունը, դա իր խնդիրն է: Մշակույթի նախարարությունը հնարավորություն չունի արվեստի դպրոցներ բացելու, և իրավասություն էլ չունի: Եթե չկա հենք, չկան հենակետային դպրոցներ, մենք չենք կարողանա որևէ բան անել»,- «Առաջին լրատվական»-ին հայտնեց հասարակայնության հետ կապերի վարչության պետը:
Իսկ եղածներին, Գայանե Դուրգարյանի խոսքով, մշակույթի նախարարությունն աջակցում է անվճար վարպետաց դասերի և որոշ այլ ծրագրերի կազմակերպմամբ:
