Հարավաֆրիկյան Հանրապետության «Շիմպանզեների դրախտ» ազգային պարկում երկու շիմպանզեներ հարձակվել են Տեխասի 27-ամյա ուսանողի վրա, որը դասախոսություն էր կարդում զբոսաշրջիկների համար: Այս մասին հաղորդում է The Daily Mail-ը:
Էնդրյու Օբերլեն կանգնած է եղել այցելուներին կապիկներից առանձնացնող ճաղավանդակի մոտ: Կապիկները նրա ոտքերից բռնել են ու քարշ տվել ճաղավանդակի տակով, որտեղով հոսանքալարեր են անցկացված եղել:
Կապիկները կծոտել են երիտասարդին: Վերջինս ծանր վնասվածքներով հոսպիտալացվել է, և այժմ կյանքի ու մահվան կռիվ է տալիս: Հարձակման հետևանքով նա կորցրել է ականջի կեսը և մի քանի մատներ: Օբերլեն ազգային պարկում զբաղվում էր շիմպանզեների վարքի հետազոտական աշխատանքով:
Կապիկներին վախեցնելու համար այգու աշխատակիցը օդ է կրակել: Միջադեպի հանգամանքների հետաքննման ընթացքում այգին փակ կլինի:
Մասնագետները դժվարանում են ասել, թե ինչն է եղել շիմպանզեների հարձակման պատճառը, սակայն նշում են, որ այս տեսակը բավականին ագրեսիվ է: Հարձակում գործած կապիկները այգում են բնակվում բացման առաջին իսկ օրից՝ 2006-ից: