Ինչպես հաղորդում է The Times of India թերթը, Պակիստանի կառավարությունն այսօր հրաժարական է տվել: Այս մասին կառավարության ղեկավար Յուսուֆ Ռեզա Գիլանին հայտարարել է կառավարության նիստի ժամանակ: Դրանից հետո Գիլանին հանդես է եկել հեռուստատեսությամբ և հայտարարել հրաժարականի մասին:
Հրաժարականը պայմանավորված է նրանով, որ պետական կառավարական ապարատն անչափ ուռճացված էր և այն կրճատելու անհրաժեշտություն կար:
Ավելի վաղ այս պահանջով հանդես էր եկել ընդդիմությունը` Պակիստանի մուսուլմանական լիգայի գլխավորությամբ, որը ղեկավարում է նախկին վարչապետ Նավազ Շարիֆը: Վերջինս սպառնացել էր, որ եթե իշխող կուսակցությունը չկրճատի բյուջեի ծախսերը 30%-ով, ապա ընդդիմությունը կպահանջի խորհրդարանական արտահերթ ընտրություններ:
Ընդդիմությունն արդեն մեկնաբանել է կառավարության հրաժարականը` հայտարարելով, որ միայն նախարարությունների կրճատումը չի հանգեցնի բյուջետային ծախսերի շեշտակի նվազման:
Պակիստանյան իշխանություններն այս քայլին են դիմում նաև այն պատճառով, որ Թունիսի և Եգիպտոսի օրինակով Պակիստանում ևս հուզումներ սկսելու սպառնալիք կա:
