РИА-Новости-ի փոխանցմամբ՝ ԵԱՀԿ գլխավոր քարտուղար Լամբերտո Զանիերը Վիեննայում տեղի ունեցած «Անվտանգության օրեր» (Security Days) կոնֆերանսի ժամանակ լուրջ մտահոգություն է հայտնել Ղարաբաղյան հակամարտության կարգավորման գործընթացում առաջընթացի բացակայության կապակցությամբ.
«ԵԱՀԿ Մինսկի խումբը, որն արդեն 20 տարի է, ինչ զբաղվում է այդ հակամարտության կարգավորմամբ, շատ լուրջ քաղաքական ջանքեր է գորածդրել խնդրի լուծման համար: Ես բարձր եմ գնահատում Ռուսաստանի նախկին նախագահ Դմիտրի Մեդվեդևի միջնորդական ջանքերը: Նրա կազմակերպած Սոչիի եռակողմ հանդիպման ժամանակ Հայաստանի ու Ադրբեջանի նախագահները շատ մոտ են եղել նրան, որ մշակեն ընդհանուր սկզբունքներ, որոնց հիման վրա հետագայում պետք է որոշում ընդունվի: Սակայն դեռ առաջընթաց չկա:
Բացի այդ, ԵԱՀԿ-ն հետևում է հայ-ադրբեջանական սահմանին միջադեպերի հաճախակիացմանը: Մտահոգվելու պատճառներ կան: Մենք փորձել ենք առաջարկել մեխանիզմներ. վստահության ամրագրման, հրադադարի ռեժիմի պահպանման խստացման, միջադեպերի հետաքննման մեխանիզմներ: Սակայն այս կամ այն պատճառով հակամարտող կողմերից մեկը թույլ չի տալիս իրագործել առաջ քաշած նախաձեռնությունները:
Ամեն ինչ շատ քաղաքականացված է. եթե կողմերից մեկը համաձայնվում է ինչ-որ բանի, ապա մյուս կողմը կարծում է, թե դա վատ նախաձեռնություն է: Ակամայից հարց է ծագում. խնդիրը մեխանիզմի՞մեջ է, թե՞ պարզապես կողմերը պատրաստ չեն որոշակի փոխզիջման գնալու: Ներկայումս ԵԱՀԿ-ն փորձում է աշխատել երկու երկրների խորհրդարանների ու հասարակական կազմակերպությունների հետ:
ԵԱՀԿ-ն փորձում է պայմաններ ստեղծել, որոնց դեպքում կառավարությունները շահգրգռվածություն կցուցաբերեն հակամարտության կարգավորման նկատմամբ: Հասարակական կարծիքի, հասարակության հետ աշխատելը գործունեության կարևոր ուղղություն է»: