Օսկար մրցանակը, որը ստացել էր ռեժիսոր Մայքլ Քերթիսը 1943 թվականին նկարահանված «Կասաբլանկա» ֆիլմի համար, աճուրդի է հանվում: Այս մասին հայտնում է Reuters-ը:
Nate D. Sanders աճուրդի տունն ակնկալում է վաճառքից 2,5-3 մլն դոլար ստանալ: Աճուրդը տեղի կունենա հունիսի 28-ին:
Մայքլ Քերթիսի Օսկարը նախկինում արդեն մեկ անգամ վաճառվել է: 2003-ին Christie’s-ի կազմակերպած աճուրդում այն 231,5 հազար դոլարով ձեռք էր բերել աճպարար Դեվիդ Կոպերֆիլդը: Այս անգամ ոսկե արձանիկը վաճառքի ներկայացրած մարդու անունը աճուրդի տան կողմից գաղտնի է պահվում:
Օսկար արձանիկները հազվադեպ են աճուրդներում հայտնվում: Օսկարի մրցանակակիրները 1950 թվականից սկսած՝ հատուկ համաձայնագիր են ստորագրում՝ պարտավորվելով չվաճառել իրենց մրցանակները: Չնայած ամերիկյան կինոակադեմիայի կողմից հնչեցված բողոքին, մինչ այդ շնորհված արձանները ժամանակ առ ժամանակ հայտնվում են աճուրդներում:
