«Այս տարի փետրվարին գյուղնախարարը հայտարարեց, թե ծիրանը շատ թանկ է լինելու: Թե ո՞վ էր իրեն նման ինֆորմացիա տվել, չգիտեմ, բայց բարեբախտաբար, Աստված չլսեց իր ձայնը, և այս տարի ծիրանը շատ է»,- այս մասին «Առաջին լրատվական»-ի հետ զրույցում հայտնեց գյուղատնտես Գագիկ Մանուչարյանը:
Նրա խոսքով՝ ծիրանի բերքը համեմատաբար վատ էր Էջմիածնի տարածաշրջանում, իսկ Հոկտեմբերյանում և մյուս շրջաններում շատ լավ էր: Նա հայտարարեց, որ այս տարի ծիրանը շատ է, լավն է, որակը նորմալ է, անցած տարվա համեմատ գները բավականին ցածր են, և արտահանումն ավելի շատ կլինի, քան անցած տարի:
Գ. Մանուչարյանի գնահատմամբ` մյուս մրգերը նույնպես առատ են և, եթե կարկտահարություն չլինի, արդյունքները լավը կլինեն:
«Միշտ թվում է, թե ինչքան շատ արտահանեն, գինն այստեղ բարձր կլինի, բայց այդպես չի: Արտահանվում է որակյալ և համեմատաբար թանկ արժեք ունեցող ծիրանը: Արտահանումը նաև արտարժույթ է բերում, և եթե պահանաջարկը շատ լինի, նոր այգիներ թող հիմնեն՝ ծիրանի, կեռասի և այլն: Նման մտավախություն չկա, որ տեղի շուկայում ծիրան չի լինի, մեր երկիրը ծիրանի երկիր է, և կարող ենք այգիների քանակն ավելացնել: Ավելի վատ կլինի, եթե չկարողանանք ծիրանն արտահանել: Բայց արտահանումը պետք է վերահսկել, և դա պետք է անի գյուղնախարարությունը, բայց որը ոչ մի վերահսկողություն և ազդեցություն ներկայում չունի»,- ասաց Գ. Մանուչարյանը:
Լուսանկարը՝ PanARMENIAN Photo-ի
