«Մուսուլման եղբայրներ» կազմակերպության ղեկավարներից մեկը` էսամ Ալ-Էրիանը, հայտարարել է, որ Եգիպտոսի նախագահ Հոսնի Մուբարաքն ունի մեկ շաբաթ իշխանությունը թողելու համար: Սակայն Ալ- Էրիանը չի նշել, թե դրանից հետո իրենք ինչ են պատրաստվում անել: Այս մասին գրում է The Guardian-ը:
«Փոխզիջում լինել չի կարող: Մուբարաքի շրջապատը հիմա կարգավորում է իր գործերը (անվտանգ հեռանալու համար.– 1in.am)։ Նրանց ժամանակ է պետք: Մենք իրենց այդ ժամանակը տալիս ենք»,- ասել է Ալ-Էրիանը: Նա նաև ասել է, որ «Մուսուլման եղբայրները» կրկին հաստատում են իրենց այն հայտարարությունը, որ չեն պատրաստվում նախագահի թեկնածու առաջադրել: «Մենք խաղաղ կազմակերպություն ենք, և գործում ենք համաձայն սահմանադրության ու օրենքի»,- ասել է նա:
Հայտնի է, որ երեկ Եգիպտոսի փոխնախագահ Օմար Սուլեյմանը հերթական անգամ ժխտել է Մուբարաքի` ժամանակից շուտ հեռանալու հնարավորությունը:
Հիշեցնենք, որ երեկ Կահիրեի Թահրիր հրապարակում տեղի է ունեցել հերթական ցույցը, որին մասնակցել է մի քանի հարյուր հազար մարդ, որոնք պահանջել են Մուբարաքի անհապաղ հրաժարականը:
