Այսպես ասած՝ նոր խորհրդարանի առաջին նիստերից հետո, երբ հաստատվեց կառավարության ծրագիրն, ու ընդունվեցին մի շարք օրինագծեր, ընդդիմադիր ուժերի, այդ թվում՝ Հայ ազգային կոնգրեսի ներկայացուցիչները տարակուսանք են արտահայտում ԲՀԿ-ի պահվածքի վերաբերյալ՝ հայտարարելով, որ ԲՀԿ-ն կամ պետք է իշխանության մաս կազմի, կամ լինի ընդդիմության դաշտում: Ինչպես հայտնի է, ԲՀԿ-ն հայտարարում է, թե ո՛չ ընդդիմություն է, ո՛չ էլ իշխանություն, այլ այլընտրանք է:
Զարմանալի է, որ ԲՀԿ-ի այս պահվածքի առնչությամբ տարակուսում են նաև Հայ ազգային կոնգրեսի ներկայացուցիչները, քանի որ հենց այս քաղաքական ուժն ու նրա առաջնորդն են, որ ամիսներ շարունակ փորձում են հասարակությանը համոզել, որ ԲՀԿ-ն անկախ է և ոչ մի վտանգ չկա ԲՀԿ-ի հետ համագործակցելու առումով: Այնպես որ, Կոնգրեսը իզուր է տարակուսում «անկախ» քաղաքական ուժի պահվածքից: Սակայն, միևնույն ժամանակ, և՛ Կոնգրեսը, և՛ այլ քաղաքական ընդդիմադիր ուժեր իզուր են կարծում, թե ԲՀԿ-ն կողմնորոշվելու կարիք ունի ու պետք է ընտրի ընդդիմության և իշխանության միջև:
ԲՀԿ-ն իրականում ընտրել է՝ իշխանության հետ միասին, և ընտրել է ընդդիմությունը: Ինչ անուն էլ որ դրվի կուսակցության ներկայիս կարգավիճակին, ամեն ինչ ցույց է տալիս հռետորաբանությունը: Հռետորաբանությամբ ԲՀԿ-ն այսօր ընդդիմություն է, ու մնացածը այլևս դառնում է ինչ-որ առումով երկրորդական, որովհետև Հայաստանի հասարակությունը քաղաքական գործընթացներին վերաբերվում, դիրքորոշում է ձևավորում՝ դատելով սիմվոլներից, ավելի շատ սիմվոլներից, քան բուն խոսքի և գործի բովանդակությունից: Եվ այս առումով ԲՀԿ-ն հանրությանը փոխանցում է ընդդիմադիր սիմվոլներ: Իսկ սա նշանակում է, որ հասարակությունն էլ ԲՀԿ-ի այդ սիմվոլներն է ընդունում։ Եվ քանի որ նաև Հայ ազգային կոնգրեսի լուռ աջակցությամբ ԲՀԿ-ն, ընդդիմադիր սիմվոլների հետ միասին, նյութական առարկաներ էլ էր փոխանցում հասարակությանը՝ տրակտոր, ակնոց և այլն, հանրության մի զգալի մասը բավական մեծ համակրանքով է վերաբերվում ԲՀԿ-ի ընդդիմադիր սիմվոլներին:
Այդ ամենի արդյունքը «Բարգավաճ Հայաստան»-ի առաջատարությունն է ընդդիմադիր դաշտում, և ներկայումս ընդդիմադիր ուժերը, հատկապես Կոնգրեսը, սկսել են այդ առիթով որոշակի տարակույսներ հայտնել, որովհետև զգում են, թե ինչպես է փախել իրենց ոտքի տակի հողն ու գնացել ԲՀԿ-ի ոտքերի տակ: Մյուս կողմից, սակայն, իրավիճակը երկակի է, քանի որ նույն Կոնգրեսի համար շատ դժվար է խոստովանել, որ ԲՀԿ-ի հարցում կա՛մ սխալվել են, կա՛մ գիտակցաբար գնացել նախընտրական անհաջող գործարքների: Այլ կերպ ասած՝ ԲՀԿ-ն իսկական ծուղակն է գցել ընդդիմությանը, հատկապես Հայ ազգային կոնգրեսին, և այսօր իրականում ոչ թե ԲՀԿ-ի, այլ Կոնգրեսի կողմնորոշվելու խնդիր կա, եթե, իհարկե, մնացել է կողմնորոշվելու հնարավորություն:
