Այսօր՝ հունիսի 24-ին ավտովթար է տեղի ունեցել Վայոց Ձորի մարզում: Այս մասին տեղեկացնում է News.armeniatv.com-ը` հղում անելով ֆոտոլրագրող Գագիկ Շամշյանին:
Ժամը 20.00-ի սահմաններում Գետափ-Մարտունի ավտոճանապարհի 6-րդ կմ հատվածում Եղեգնաձոր քաղաքի բնակիչ 26-ամյա Էդվարդ Արամյանը, վարելով «Նիսան Ալտիմա» մակնիշի 88 ՍՍ 303 համարանիշի ավտոմեքենան, դուրս է եկել ճանապարհի ձախ երթևեկելի մասից և բախվել ծառին:
Վթարի արդյունքում վարորդը և ուղևոր՝ նույնպես Եղեգնաձոր քաղաքի բնակիչ 23-ամյա Գեդեոն Հարությունյանը տեղափոխվել են Եղեգնաձորի հիվանդանոց:
Գ. Շամշյանը հայտնել է, որ իր տեղեկություններով վերջինիս վիճակը ծայրահեղ ծանր է: Նա ունի անրակի կոտրվածք և վնասվածքներ գլխի մասում:
Գ. Շամշյանին հայտնի է դարձել նաև, որ երկուսն էլ ծառայում են ՊՆ N զորամասում` որպես դասակի հրամանատարներ:
Դեպքի վայր են ժամանել Ճանապարհային ոստիկանության 2-րդ սպայական գումարտակի 6-րդ վաշտի 1-ին դասակի աշխատակիցները՝ հրամանատար Կարեն Օհանյանի գլխավորությամբ:
Դեպքի վայրում քննչական աշխատանքները ղեկավարել է Ռազմական ոստիկանության 8-րդ կայազորային քննչական բաժնի քննիչ Ասպուր Ավետիսյանը:
