Անշարժ գույքի շուկայում նույն սառած վիճակն է և դրա վրա չի ազդել անգամ սիրիահայերի հոսքը Հայաստան: Այս մասին «Առաջին լրատվական»-ին հայտնեց անշարժ գույքի շուկայի մասնագետ Հարություն Ավետիսյանը:
«Սիրիահայերը բոլորովին հետաքրքրված չեն տուն ձեռք բերելով, չեն ուզում բնակարաններ գնել: Գործարքների առումով սառած վիճակ է, գների առումով էլ փոփոխություն չկա, նույն ձևով սառած է»,- ասաց Հ. Ավետիսյանը՝ նշելով, որ անշարժ գույքի շուկայում ակտիվացումը պայմանավորված է երկրի վիճակի լավացմամբ:
Ըստ նրա՝ նախ- և հետընտրական շրջանն էլ է ազդել շուկայի սառեցման վրա. հնարավոր է, որ նախագահական ընտրություններից հետո ակտիվացում լինի, հնարավոր է նաև, որ վատացում լինի: Դա կախված է երկրի վիճակից՝ գործազրկությունից, արտահոսքից և այլն»:
