Լոնդոնում Էկվադորի դեսպան Անա Ալբանին կանչել են Կիտո՝ խորհրդակցության համար՝ կապված WikiLeaks կայքի հիմնադիր Ջուլիան Ասանժի գործի հետ: Այս մասին հայտնել է Էկվադորի նախագահ Ռաֆայել Կորրեան:
«Մենք կանչել ենք մեր դեսպանին, քանի որ դեպքը մեզ շատ լուրջ է թվում, մենք պատրաստվում ենք շատ զգույշ և պատասխանատու մոտենալ տվյալ իրավիճակին, բայց թույլ չենք տա որևէ մեկին ճնշում գործադրել մեզ վրա»,- նախագահի խոսքերը մեջբերում է Univision հեռուստաալիքը:
Կորրեան ավելացրել է, որ Էկվադորի իշխանությունները իրավիճակը ներկայացնող հաղորդագրություն են ստացել բրիտանական կողմից և պատրաստվում են նկատի ունենալ այն, սակայն վերջնական որոշում կկայացնի Էկվադորը: Էկվադորի նախագահն ասել է, որ Ասանժը վախենում է իր կյանքի համար, քանի որ չի բացառվում, որ նրան քաղաքական նկատառումներով հանձնեն ԱՄՆ-ին, որտեղ նրան կարող են մահապատժի ենթարկել: Իսկ դա, Էկվադորի նախագահը նշել է, որ հակասում է մարդու իրավունքներին:
Հիշեցնենք, որ հունիսի 19-ին Ասանժը հայտնվել էր Լոնդոնում Էկվադորի դեսպանատանը՝ իրեն քաղաքական ապաստան տալու խնդրանքով: Մինչ Էկվադորի իշխանությունները որոշում կկայացնեն Ասանժը գտնվում է այդ երկրի «պաշտպանության ներքո», որի դեսպանատան տարածք բրիտանական ոստիկանությունը մտնելու իրավունք չունի:
