«Եվրո-2012»-ի քառորդ եզրափակչի երկրորդ խաղում Գդնասկում ուժերը չափեցին Գերմանիայի և Հունաստանի հավաքականները:
Երկու թիմերի կազմերում նախորդ խաղերի համեմատ փոփոխություններ կային: Յոահիմ Լյովը պահեստայինների նստարանին էր թողել Լուկաշ Պոդոլսկիին, Թոմաս Մյուլլերին ու Մարիո Գոմեսին և խաղադաշտ դուրս բերել Մարկո Ռոյսին, Անդրե Շյուրլեին ու Միրոսլավ Քլոզեին: Հունաստանի ընտրանու մեկնարկային կազմից որակազրկման պատճառով բացակայում էր թիմի ավագ Գեորգիոս Կարագունիսը:
Հանդիպման գլխավոր մրցավար Դամիր Սկոմինայի` խաղասկիզբն ազդարարող սուլիչից անմիջապես հետո գերմանական մեքենան գործի անցավ: Օզիլի 2 շքեղ փոխանցումներից հետո առաջին դեպքում մրցավարը սխալմամբ խաղից դուրս վիճակ արձանագրեց, իսկ երկրորդ դեպքում խաղընկերը չկարողացավ դիպուկ հարված կատարել: 4-րդ րոպեին ուշադրության կենտրոնում հայտնվեց Մադրիդի «Ռեալ»-ի մյուս ֆուտբոլիստը` Սամի Խեդիրան, ում հարվածից հետո Սիֆակիսը մեծ դժվարությամբ ետ մղեց գնդակը, իսկ վրա հասած Միրոսլավ Քլոզեն այն ուղարկիեց դարպասը, սակայն խաղից դուրս վիճակում էր:
Գերմանացիները հիանալի էին դրսևորում իրենց, իսկ Հունաստանի հավաքականի ֆուտբոլիստները խղճուկ տեսք ունեին Յոահիմ Լյովի սաների առջև: 11-րդ րոպեին հարվածային դիրք դուրս եկավ Մարկո Ռոյսը, սակայն հարվածը շեղ ստացվեց: Ռոյսն ու Շյուրլեն ակնհայտորեն արագացրել էին գերմանացիների խաղը, իսկ գերմանական մեքենան ավելի դաժան էր դարձել: Ռոյսն ու Շյուրլեն Օզիլի հետ իսկական կառուսել էին ստեղծել առջևի գծում, որոնց թիկունքից օգնում էին Խեդիրան ու Շվայնշտայգերը: Ձախից ավանդաբար հաջող միացումներ էր կատարում Ֆիլիպ Լամը:
Հենակետային գոտում մի քանի կոպիտ սխալներ թույլ տվեց Բաստիան Շվայնշտայգերը, սակայն 1-2 ֆուտբոլիստներով գրոհող Հունաստանի հավաքականը չէր կարող օգտվել դրանցից: 22-24-րդ րոպեներին գերմանացիները 4 գոլային պահ ստեղծեցին, բայց հարվածները կա՛մ շեղ էին, կա՛մ ետ էր մղում դարպասապահը:
35-րդ րոպեին «Ռեալ»-ի զույգը կրկին հայտնվեց ուշադրության կենտրոնում: Երեք ֆուտբոլիստների շրջանցելուց հետո Օզիլը գնդակը փոխանցեց Խեդիրային, ով հերթական դիպուկ հարվածը կատարեց միջին տարածությունից, սակայն հույների դարպասապահը տեղում էր:
Այն ինչ չէին կարողանում անել կիսապաշտպաններն ու հարձակվողները, արեց թիմի ավագ Ֆիլիպ Լամը` հեռահար հարվածով դառնալով հրաշալի գոլի հեղինակ:
55-րդ րոպեին գնդակը կորցրեց Շյուրլեն, և ազատ տարածություն ստացած Սալպինգիդիսն աջ եզրից մեծ արագությամբ շարժվեց առաջ ու գնդակը փոխանցեց Սամարասին, ով վերականգնեց հաշվի հավասարակշռությունը:
Հույները կրկին նահանջեցին և փորձեցին փակվել սեփական տուգանային հրապարակում, բայց գերմանական մեքենան վրաերթի ենթարկեց Սանտուշի սաներին: 61-րդ րոպեին հիասքանչ գոլի հեղինակ դարձավ Սամի Խեդիրան: 7 րոպե անց Քլոզեն հաշիվը դարձրեց 3:1, իսկ Մարկո Ռոյսը 74-րդ րոպեին խփեց իր թիմի 4-րդ գոլը: 89-րդ րոպեին Ժերոմ Բոատենգը ձեռքով խաղաց սեփական տուգանային հրապարակի մատույցներում, իսկ նշանակված 11մ հարվածը դիպուկ իրացրեց Սալպինգիդիսը:
Հերթական անգամ Լյովի որոշումն արդյունավետ էր: Ռոյսը, Շյուրլեն ու Քլոզեն հիանալի ինտեգրվեցին բունդեսթիմի խաղին, իսկ գերմանացիները ֆուտբոլային ներկայացում պարգևեցին իրենց երկրպագուներին:
Այսպիսով` Գերմանիա – Հունաստան` 4:2:
