«20-րդ դարի վերջի – 21-րդ դարի սկզբի և ներկայումս ընթացող ամենակարևոր գործընթացը արխիվային փաստաթղթերի թվայնացումն ու արխիվային փաստաթղթերի էլեկտրոնային շտեմարանի ստեղծումն է»,- Ազգային արխիվի թվայնացման թեմայով խոսելիս նշեց Ազգային արխիվի տնօրեն Ամատունի Վիրաբյանը:
Անցյալ տարի մոտ 2 հազար վավերագրական ֆիլմից թվայնացվել է` 471-ը, 2009 թ. թվայնացվել է մոտ 400 վավերագրական ֆիլմ:
«Եվս 2-3 տարի, և արխիվում գտնվող վավերագրական բոլոր ֆիլմերը, որոնք ստեղծվել են Հայաստանում սկսած 1920-ական թթ., կունենան թվային տարբերակ: Ֆրանսիայից ձեռք բերած սարքավորումը հնարավորություն է տալիս թվայնացնելու վավերագրական ֆիլմերը: Հետագայում գուցե թվայնացվեն նաև Խորհրդային միության տարբեր երկրներում ստեղծված ֆիլմերը, որոնք մենք պահպանում ենք»,- նշեց արխիվի տնօրենը:
Ազգային արխիվում կա մոտ 3,522,506 թղթյա գործ, որոնք ևս թվայնացման կարիք ունեն.
«Փորձի համար թվայնացնում էինք` սովորական սքան անելով, ինչը դանդաղ և աշխատատար էր: Անցյալ տարի այդ տարբերակով թվայնացրել ենք մոտ 8 հազար թերթ: 2010 թ. կառավարությունը պահուստային ֆոնդից 80 մլն դրամ տրամադրեց և ևս 25 մլն-ը՝ արխիվի կողմից, որպեսզի ստեղծվեն նոր արխիվապահուստներ. ժամանակակից, շարժական դարակաշարերով, հակահրդեհային համակարգով: Նոր արխիվապահուստների բացումը կլինի մայիս կամ ապրիլ ամիսներին:
Մենք այս տարի կգնենք երկու սարքավորում, որոնք հնարավորություն կտան այդ 8 հազար թերթը թվայնացնել ընդամենը երկու օրվա ընթացքում»:
Ազգային արխիվը փաստաթղթերից շատերը տրամադրում է անվճար, իսկ այն փաստաթղթերի ստացման գինը, որոնք վճարովի են, մատչելի է մյուս երկրների համեմատ.
«Այն քաղաքացիները, որոնք լուծում են իրենց սոցիալ-տնտեսական խնդիրները, փաստաթղթերը նրանց անվճար են մատուցվում: Անշարժ գույքի մասին տեղեկանքը տրամադրվում է 5 հազար դրամով, իսկ եթե մեկ օրվա ընթացքում է հարկավոր, ապա 10 հազար դրամով: Տեղեկանքների միայն 25% է վճարովի, մնացած 75 %-ը անվճար է»,-ավելացրեց արխիվի տնօրենը:
