Միլանի քաղաքային իշխանությունները չեղյալ են համարել իրենց կողմից նախկինում ընդունված այն որոշումը, որով Դալայ Լամային շնորհվում էր Միլանի պատվավոր քաղաքացու կոչում։ Այս մասին հաղորդում է «Ազատություն» ռադիոկայանը։
Ավելի վաղ ընդունված որոշման համաձայն՝ հունիսի 26-28-ն ընկած ժամանակահատվածում Միլան կատարվելիք այցելության ժամանակ Դալայ Լամային մեծ հանդիսավորությամբ պետք է հանձնվեր պատվավոր քաղաքացու կոչում։ Այս որոշումը հաստատել էին քաղաքային խորհրդի բոլոր խմբակցությունները։ Սակայն Չինաստանի ճնշման տակ քաղաքային իշխանությունները ստիպված են եղել չեղյալ հայտարարել իրենց որոշումը։ Որոշ տեղեկություններով՝ Միլանի իշխանությունների վրա ճնշում են գործադրել նաև Իտալիայի արտաքին գործերի նախարարությունն ու Միլանի շրջանային իշխանությունները։
Նաև հաղորդվում էր, որ Դալայ Լամային պատվավոր քաղաքացի շնորհելուց հետո Չինաստանը պատրաստվում էր հայտարարել «Միլան էքսպո-2015»-ի բոյկոտի մասին, որտեղ չինական տաղավարը լինելու է ամենամեծը։
