Վանաձորի արհեստական լճում լողալն արգելվում է։ Այս մասին ահազանգում են լճի բոլոր ափերին տեղադրված ցուցանակները: «Սանէպիդկայանը գրություն է ուղարկել՝ ժամանակավոր դադարեցնել լողալը: Աշխատում ենք հնարավորինս արգելել, չնայած լողացողներ կան»,– ասաց Վանաձոր քաղաքի արհեստական լճի վարձակալ, «Ազատամարտիկ Պարգև» ՍՊԸ–ի տնօրեն Պատվական Թորոսյանը:
Մինչև 4,6 մ խորություն ունեցող արհեստական լիճը 1965 թվականից ի վեր բաց համակարգով է գործել՝ Վանաձոր գետը թափվում է արհեստական լիճ և հակառակը՝ լճի ջուրը նորից լցվում է գետ: Շաբաթական չորս անգամ ջրից նմուշ է վերցվում՝ հետազոտությունների համար: Չնայած լճում անընդհատ քլորացում է կատարվում, ինչը ենթադրում է, որ այն կարող է ծառայել որպես լողավազան, առողջապահության նախարարության պետական հիգիենիկ և հակահամաճարակային տեսչության (ՊՀՀՏ) Լոռու մարզային կենտրոնը պնդում է, որ լողալն արգելվել է ստեղծման օրվանից:
Վերջին տարիներին մեր գետերի աղտոտվածությունն անզեն աչքով էլ է տեսանելի, ուստի քաղաքացիներն ապահովագրված չեն տարատեսակ վարակներից և դժբախտ պատահարներից: Թեև ՊՀՀՏ-ն հետևում է, որ լճի հատակը մաքրվի, տիղմը հանվի, սակայն ջրի որակը դրանից չի փոխվում: ՊՀՀՏ-ն զգուշացնում է, որ մանրէաբանական շեղումներ ունեցող ջրում լողալը վտանգավոր է. «Սուր վարակիչ հիվանդությունների նկատմամբ խիստ վերահսկողություն է տարվում: Այս պահին ջրում բացակայում է խոլերայի հարուցիչը, սակայն մյուս աղիքային ինֆեկցիաներից լիճն ապահովագրված չէ, վտանգավոր է անգամ, եթե մի կում ջուր կուլ տան»,- ասում է ՊՀՀՏ Լոռու մարզային կենտրոնի տնօրեն Կարինե Միրզոյանը:
Պատվական Թորոսյանը տարիներ ի վեր կտրականապես հերքել է ջրի աղտոտվածության մասին լուրերը, նույնիսկ ցույց է տվել ՊՀՀՏ Լոռու մարզային կենտրոնի թույլտվությունները։ «Էն չի, որ ասեմ, ես դրանից շահ ունեմ, որ մախինացիա անեմ, Սանէպիդկայանին կաշառեմ, հակառակը՝ ավելորդ լարվածություն ու պատասխանատվություն է, փրկարարներ ունենալու անհրաժեշտություն` 3 փրկարար է աշխատում: Իմ համար ավելի լավ, թող չլողան, նավակից օգտվեն, շահույթ կունենամ», – ասում է լճի վարձակալը:
Ջրի մաքրությունն արհեստական լճի միակ խնդիրը չէ: Գրանցվում են նաև դժբախտ պատահարներ՝ ջրահեղձությունից մինչև ինքնասպանություն։ Ոչ մեկը կարգին լողալ չգիտի, էսօր մի երեխա հոգնել էր, ես եմ ջրից հանել: Լողացողները անվտանգության կանոնները չեն պահպանում, չեն հետևում կարմիր գծին: Հաճախ ցուցադրական ցանկապատից են թռչում»,- սրտնեղում է Պ. Թորոսյանը:
1965 թվականից լճում մահվան 14 դեպք է գրանցվել:
