Արտագաղթյալ Հովհաննես Գրիգորյանի խոսքերով՝ եթե կարողանա Հայաստանում ինչ-որ բիզնես դնել և ապրել բարեկեցիկ կյանքով, անպայման կվերադառնա: Այսօր ասուլիսի ընթացքում նա ասաց, որ Հայաստանում նկատում է տեղաշարժ՝ դեպի լավը, մնում է, որ կիրառվի սահմանված օրենքը:
Արտագաղթյալն ապրում է ԱՄՆ-ում, այնտեղ է տեղափոխվել 13 տարի առաջ՝ ֆինանսական խնդիրների պատճառով: Նրա մեկնաբանությամբ՝ Հայաստանի և ԱՄՆ-ի միջին խավի տարբերությունը շատ մեծ է. այնտեղ միջին խավ ասվածը բավականին մեծ թիվ է կազմում:
Ասուլիսի մյուս մասնակից՝ հոգեբանական գիտությունների դոկտոր Սամվել Խուդոյանն էլ ասաց, որ երկրից արտագաղթելու հոգեբանական պատճառները շատ են և մտահոգիչ. «Երկիրը չլքելու համար հայերին մի քիչ հայրենասիրություն է պակասում: Մեր պապերը տարբեր խնդիրների պատճառով միշտ էլ ստիպված են եղել արտագաղթել, դրա համար մեզանում ձևավորվել է յուրահատուկ պատկերացում՝ եթե վատ է, կարելի է գնալ»:
Քաղաքագետ Հայկ Սուքիասյանն էլ ասաց, որ հարկավոր է անցկացնել համալիր հետազոտություն, որտեղ պետք է ներառել քաղաքագետների, սոցիոլոգների, հոգեբանների, որպեսզի արտագաղթի հիմնական պատճառները հնարավոր լինի ամբողջությամբ պարզել. «Արտագաղթը կանխելու համար անհրաժեշտ է պետական մակարդակով զբաղվել այս խնդրով ու կանխել այն»:
