ԱՄՆ պետքարտուղար Հիլարի Քլինթոնը Ռուսաստան այցի ժամանակ ՌԴ ԱԳ նախարար Սերգեյ Լավրովի հետ կքննարկի Սիրիայում տիրող իրադրությունը։ Այս մասին հաղորդել է Պետդեպարտամենտի պաշտոնական ներկայացուցիչ Վիկտորյա Նուլանդը: Այս մասին գրում է Ria Novosti-ն:
Ավելի վաղ Պետդեպարտամենտը հայտնել էր, որ Քլինթոնը Ռուսաստան կայցելի հունիսի 28-30-ը: Նա կգլխավորի «Կանայք տնտեսության մեջ» ամերիկյան պատվիրակությունը` Ասիա-խաղաղօվկիանոսյան տնտեսական համագործակցության ֆորումում, որը տեղի կունենա Սանկտ Պետերբուրգում:
«Այցելությունը, բնականաբար, նախատեսված է այն շրջանակներում, թե ինչ են անում պետքարտուղարը և ԱՄՆ-ը տնտեսության մեջ գտնվող կանանց սատարելու համար: Սակայն այցելությունը պետքարտուղարին հնարավորություն կտա հանդիպելու Լավրովի հետ… Եվ Սիրիան կլինի այն թեման, որը նրանք կուզենան քննարկել»,- ասել է Նուլանդը չորեքշաբթի օրը տեղի ունեցած ճեպազրույցի ժամանակ:
