ԱՄՆ–ի և Իսրայելի հետախուզական կառույցները կանգնած են գարնանը հայտնաբերված Flame վիրուսի թիկունքում: Վիրուսը, ինչպես պարզել են տեղեկատվական անվտանգության փորձագետները, ուղղված էր Իրանի և մերձավորարևելյան երկրների համակարգիչներից արտադրական գծագրերը գողանալուն։ Այս մասին հաղորդում է Washington Post թերթը՝ հղում անելով ԱՄՆ կառավարության մի քանի անդամների, ովքեր ցանկացել են պահել իրենց անձի գաղտնիությունը:
Վիրուսն առավել լայն տարածում է գտել Իրանի տարածքում և հարևան երկրներում, ինչը փորձագետներին թույլ է տվել ենթադրել, որ Իրանը եղել է հարձակման գլխավոր թիրախը:
Washington Post-ի աղբյուրը հաստատել է տեղեկությունն այն մասին, որ վիրուսը մշակել է ԱՄՆ Ազգային անվտանգության գործակալությունը, Կենտրոնական հետախուզական վարչությունը և իսրայելական զինվորականները, իսկ հարձակման նպատակն իրանական միջուկային ծրագրի զարգացման դանդաղեցումն է: Իրանի իշխանությունները վստահեցնում են, որ միջուկային տեխնոլոգիաներ մշակում են բացառապես խաղաղ նպատակներով, սակայն ԱՄՆ–ը և մի շարք երկրներ Իրանին մեղադրում են միջուկային զենք ստեղծելու փորձի մեջ:
Flame-ը դարձել է 4-րդ «կիբերզենքը», որը հայտնի է տեղեկատվական անվտանգության մասնագետներին: Նմանատիպ առաջին ծրագիրը եղել է Stuxnet-ը, իսկ երկրորդը 2011 թվականին հայտնաբերված Duqu-ն, որը նախատեսված է կոնֆիդենցիալ տվյալների թաքուն հավաքման համար:
Երրորդ վիրուսն ունի Wiper պայմանական անունը և այս տարվա ապրիլին ոչնչացրել է Իրանի նավթային խոշոր ընկերություններից մեկի ողջ տեղեկությունը և այդպիսով մի քանի օր ամբողջությամբ խաթարել է ընկերության աշխատանքը: Այդ միջադեպն ուսումնասիրելու ժամանակ էլ «Կասպերսկու լաբորատորիայի» մասնագետները հայտնաբերել էին չորրորդ վիրուսը` Flame-ը:
