ՀՀ տնտեսական ակտիվությունն այս տարվա մայիսը ապրիլի նկատմամբ աճել է 14.1%-ով, իսկ 2012 թ. հունվար-մայիսը նախորդ տարվա հունվար-մայիսի համեմատ այս ցուցանիշն աճել է 7.4%-ով:
Ազգային վիճակագրական ծառայության այսօր հրապարակած մակրոտնտեսական ցուցանիշների համաձայն՝ սպառողական գները մայիսին ապրիլի համեմատ նվազել են 1.3%-ով, իսկ 2012 թ. հունվար-մայիսը 2011-ի հունվար-մայիսի նկատմամբ ապրանքները թանակցել են 2.5%-ով, իսկ միջին անվանական աշխատավարձը համապատասխանաբար նվազել է 1.5%-ով և աճել 4.7%-ով:
2012 թ. հունվար-մայիսը նախորդ տարվա հունվար-մայիսի համեմատ արդյունաբերական արտադրանքի ծավալն աճել է 15.0%-ով, ծառայությունների ծավալը՝ 10.4%-ով, էլեկտրաէներգիայի արտադրությունը՝ 10.1%-ով, գյուղատնտեսական համախառն արտադրանքը՝ 3.2%-ով: Միակ անկումը շինարարության ոլորտում է՝ 8%:
Այս տարվա հունվար-մայիսին նախորդ տարվա նույն ժամանակաշրջանի համեմատ արտաքին առևտրաշրջանառության ծավալներն աճել են 9%-ով, այդ թվում արտահանումը՝ 15.2% (կազմելով 561.7 մլն դոլար), իսկ ներմուծումը` 7.1%-ով (կազմելով 1677.8 մլն դոլար):
