Ազգային հարստությունը հողն է, որն անարդյունավետ է օգտագործվում մեր երկրում: Ի պատասխան ԲՀԿ խմբակցության պատգամավոր Գուրգեն Արսենյանի հարցի` ո՞րն է կառավարության ծրագրում նշված ազգային հարստությունը, վարչապետ Տիգրան Սարգսյանը այսօր հայտարարեց, թե սեփականատերերը մեծ հողատարածքներ են ստացել և չեն օգտագործում, մինչդեռ միջազգային պրակտիկայով պետությունը պարտադրում է հողը մշակել: ՀՀ-ում նախկինում երեք տարի հողը չմշակելու դեպքում գյուղապետերն իրավունք ունեին դիմել դատարան և զրկել սեփականատիրոջը սեփականության իրավունքից, բայց այս մեխանիզմը չէր աշխատում, որովհետև գյուղապետերը չեն կարողանում գյուղացիներին դատի տալ: Ներկայում կառավարությունը, ըստ վարչապետի, մշակել է հավելյալ մեխանիզմներ` հողատերերին պարտադրելու, որ հողատարածքները մշակեն:
Անդրադառնալով Գ. Արսենյանի մյուս հարցին` ծրագրում գրված է «Հարկային և մաքսային համակարգերը պետք է գործեն՝ ելնելով արդարության սկզբունքից», ո՞րն է դրա իրավական նորմը, Տ. Սարգսյանը պատասխանեց, որ շահութահարկի բնագավառում լրջագույն վարչարարական խնդիրներ կային, այսօր այն բարեփոխումները, որ իրականացվել են, թույլ են տալիս էապես ավելացնել շահութահարկի տեսակարար կշիռը, և ՊԵԿ-ն ունի բավականաչափ գործիքակազմ հավասար պայմաններ ապահովելու համար:
«Սա էլ պատասխանն է, թե ինչ է նշանակում հավասար պայմաններ, որը դասագրքային սկզբունք է: ՀՀ-ում կան դեռ շեղումներ այս մասով, և մենք չենք կարողանում ապահովել հավասարություն: Մտադիր ենք բացթողումները շտկել»,- ասաց Տ. Սարգսյանը:
Գ.Արսենյանի հաջորդ հարցին` ջերմոցային տնտեսությունների ծավալները նախատեսվում է 3 անգամ ավելացնել, ինչի արդյունքում շեշտակիորեն կավելանա բերքը, ո՞րն է այդ «շեշտակին», Տ. Սարգսյանը պատասխանեց, որ ջերմոցային տնտեսությունների վերաբերյալ ամենապարզ ցուցանիշը գնաճն է, քանի որ ի տարբերություն մեր հարևան երկրների՝ գների տատանողականությունը շատ բարձր է. ամռանը գյուղմթերքների գները կտրուկ նվազում են՝ նույնիսկ 2-3անգամ, և անհրաժեշտ է այդ կտրուկ տատանումները նվազեցնել, իսկ դրան կարելի է հասնել ջերմոցային տնտեսությունների ավելացմամբ:
