Վերջին ամսվա ընթացքում քննարկվող «ամենամոդայիկ» թեման Թունիսում և Եգիպտոսում տեղի ունեցող իրադարձություններն են, որոնք ոմանց բնորոշմամբ հեղափոխություն են, պայքար հանուն ժողովրդավարության ապագայի, ուրիշներն այն անվանում են քաոս:
Քաղաքական վերլուծաբան Դավիթ Պետրոսյանը, «Առաջին լրատվական»-ի խնդրանքով անդրադառնալով արաբական աշխարհում տեղի ունեցող իրադարձություններին, նշեց.
«Այդ երկրներում մարդիկ իշխել են բավական երկար ժամանակ, գրեթե երեսուն տարի: Եվ այդ ընթացքում չի եղել իշխանափոխություն: Ուշագրավ է, որ հեղափոխությունների մասնակիցների զգալի մասը այն մարդիկ չեն, որոնք գտնվում են սոցիալական ծանր պայմաններում: Այդ մարդիկ պահանջում են, որ գործող իշխանությունը հեռանա, քանի որ նրանք այլ իշխանավոր չեն տեսել: Այդ պատճառով էլ նշված երկրներում տեղի է ունեցել լճացում»:
Հնարավո՞ր է, որ այդ հեղափոխությունների ալիքը անդրադառնա նաև Հայաստանի վրա: Դավիթ Պետրոսյանն ուշադրություն է դարձնում այն հանգամանքի վրա, որ Հայաստանում սոցիալական վիճակը շատ ծանր է, և այն հնարավոր է, որ տրանսֆորմացիայի ենթարկվի ու հանգեցնի քաղաքական իրավիճակի փոփոխության:
«Չմոռանանք, որ մենք ունենք խնդիրներ` կապված 2008 թ. ՀՀ Նախագահի կեղծիքներով ու բռնություններով անցած ընտրությունների, Մարտի 1-ի, քաղբանտարկյալների հետ: Մարտի 1-ի հետևանքով ունենք տասը զոհ, բացահայտված չեն Մարտի 1-ի սպանդի մեղավորները: Առ այսօր չունենք այդ հարցերի պատասխանները, ինչի պատճառով էլ հասարակության ներսում շարունակում է պահպանվել լարվածությունը»:
Դավիթ Պետրոսյանը նշեց, որ նույնիսկ եթեր չտրամադրեցին «Ա1+» հեռուստաընկերությանը: Հայաստանում ստեղծված վիճակը Դավիթ Պետրոսյանը գնահատում է անհրաժեշտ, բայց ոչ բավարար պայման փոփոխությունների հասնելու համար:
