Թուրքական Cihan լրատվական գործակալության փոխանցմամբ՝ Թուրքիայի էներգետիկայի ու բնական պաշարների նախարար Թաներ Յըլդըզը լրագրողների հետ զրույցում հայտարարել է, որ Հաքքարի նահանգում PKK-ի իրականացրած խոշոր հարձակման ժամկետն ամենևին էլ պատահական չէր ընտրված.
«Ավելի վաղ PKK-ն Բրազիլիա և Չիլի կատարած Էրդողանի այցերի ժամանակ իրականացրել է նմանատիպ հարձակումներ: Այսօրվա հարձակումը նույնպես պատահական չէր: Մենք լսեցինք 8 զինծառայողի զոհվելու մասին, և ես անմիջապես հիշեցի Էրդողանի այցերը դեպի Բրազիլիա ու Չիլի: Այն ժամանակ զոհվել էր 9 զինծառայող»:
Թուրքական մամուլն իր հերթին ուշադրություն է դարձրել նրա վրա, որ G-20-ի գագաթնաժողովին մասնակցելու նպատակով Մեքսիկայում գտնվող վարչապետ Ռեջեփ Էրդողանը պետք է այսօր հանդիպի ԱՄՆ նախագահ Բարաք Օբամայի հետ, և որ PKK-ի այդ հարձակումը նախորդեց Էրդողան-Օբամա հանդիպմանը: Մեքսիկայից Էրդողանը մեկնելու է Բրազիլիա: 2009 թվականին նույնպես Էրդողան-Օբամա հանդիպումից առաջ էլ PKK-ն սպանել էր 7 զինծառայողի:
