«Հարսնաքար» ռեստորանային համալիրում հունիսի 18-ի երեկոյան դաժան ծեծի ենթարկված Վահե Ավետյանի վիճակը շարունակում է մնալ ծայրահեղ ծանր է: Մուրացանի անվան զինվորական հոսպիտալի քիթ-կոկորդ-ականջ բաժանմունքի վարիչ, ռազմական բժիշկ Ավետյանը դեռ գտնվում է Մուրացանի անվան զինվորական հոսպիտալի վերակենդանացման բաժանմունքում։ Նա նախօրեին ևս մեկ անգամ ենթարկվել է վիրահատության և գտնվում է կոմայի մեջ:
33-ամյա բժշկի մոտ, ինչպես հայտնի է, ախտորոշվել է գանգուղեղի փակ տրավմա, գլխուղեղի ծանր սալջարդ և սուբդուրալ հեմատոմա:
Հոսպիտալի վերակենդանացման բաժնի պետ, բուժծառայության փոխգնդապետ Հայկ Անտոնյանի ներկայացմամբ` Վահեի ուղեղում առաջացել է հեմատոմա, ինչի արդյունքում գլխուղեղի մի կիսագնդի մի մասը տեղափոխվել է մյուս կիսագնդի մեջ:
Հիշեցնենք, որ Վահե Ավետյանին և Մուրացանի հոսպիտալի մեկ այլ բժշկի` Արտակ Բայադյանի վիճակը ծանր կայուն է:
Նշենք, որ տուժածների թվին ավելացել է զինվորական հոսպիտալի կլինիկական օրդինատոր, ավագ լեյտենանտ Գարիկ Սողոմոնյանը, որի առողջական վիճակը բժիշկները գնահատում են կայուն ծանր: Նա մեկ օր տանն է մնացել, բայց քանի որ Սողոմոնյանի վիճակը սկսել է բարդանալ, նրան նույնպես հիվանդանոց են բերել:
