ՌԴ մայրաքաղաք Մոսկվայում ավարտվեց Միխայիլ Տալի 7-րդ հուշամրցաշարը:
Հայ գրոսմայստեր Լևոն Արոնյանը ևս 4 շախմատիստների հետ վաստակեց 4.5 միավոր և լրացուցիչ ցուցանիշներով զբաղեցրեց 4-րդ տեղը:
Լևոնը մրցաշարում մեկնարկեց հաղթանակով` առաջին տուրում առավելության հասնելով Նակամուրայի նկատմամբ: Հաղթանակին հետևեց Տոմաշևսկու հետ ոչ-ոքին (Արոնյանը խաղաց սև ֆիգուրներով): 3-րդ տուրում Արոնյանն անսպասելիորեն զիջեց Լյուկ Մքշեյնին: Հաջորդ պարտիան Հայաստանի ներկայացուցիչն ավարտեց ոչ-ոքի` խաղաղությամբ բաժանվելով Կրամնիկի հետ, իսկ 5-րդ տուրում կրեց իր երկրորդ պարտությունը` կրկին սպիտակ ֆիգուներով, այս անգամ զիջելով Մորոզևիչին:
6-րդ տուրում տեղի ունեցավ մրցաշարի կենտրոնական մրցավեճը` ՖԻԴԵ-ի դասակարգման աղյուսակով աշխարհի 2 ուժեղագույն շախմատիստների` Արոնյանի և Կառլսենի միջև: Պարտիան ավարտվեց ոչ-ոքի: 6-րդ տուրից հետո Լևոնը վաստակել էր ընդամենը 2.5 միավոր:
Հաջորդ 3 տուրերն ավելի արդյունավետ էին. Գրիշչուկի և Ռաջաբովի հետ ոչ-ոքիներին հետևեց վերջին տուրում Կարուանայի նկատմամբ տարած հաղթանակը, որը մրցաշարում հաղթանակ պարգևեց Կառլսենին, ով սև խաղաքարերով պարտության մատնեց Մքշեյնին ու 5.5 միավորով հռչակվեց չեմպիոն:
Տալի 7-րդ հուշամրցաշարի մրցաշարային աղյուսակն ունի հետևյալ տեսքը`
1. Մագնուս Կառլսեն – 5.5 միավոր
2. Ֆաբիանո Կարուանա – 5
3. Թեյմուր Ռաջաբով – 5
4. Լևոն Արոնյան – 4.5
5. Ալեքսանդր Գրիշչուկ – 4.5
6. Ալեքսանդր Մորոզևիչ – 4.5
7. Վլադիմիր Կրամնիկ – 4.5
8. Լյուկ Մքշեյն – 4
9. Հիկարու Նակամուրա – 4
10. Եվգենի Տոմաշևսկի – 3.5