Ամփոփվել են մայրաքաղաքի վարչական շրջանների մայիս ամսվա կատարած աշխատանքների գնահատման և վերլուծության արդյունքները:
Ըստ այդմ համեմատաբար բարձր ցուցանիշներ են գրանցել Դավթաշեն, Ավան և Արաբկիր վարչական շրջանները: Այս մասին «Առաջին լրատվական»-ին հայտնում են Երևանի քաղաքապետարանի տեղեկատվության և հասարակայնության հետ կապերի վարչությունից:
Անդրադառնալով քաղաքային տնտեսության տարբեր ոլորտներում կատարված աշխատանքների ցուցանիշներին, քաղաքապետ Տարոն Մարգարյանը առանձնակի կարևորել է սեփական եկամուտների հավաքագրման ուղղությամբ հետևողական աշխատանքի ամրագրումը, հատկանշելով, որ քաղաքային տնտեսության տարատեսակ ծրագրերի իրականացման հարցում առաջնահերթը հենց այս բաղադրիչի մասով կայուն արդյունքների ապահովումն է: Անդրադառնալով ապօրինի շինարարության մասով գրանցված ցուցանիշներին, քաղաքապետը նկատել է, որ թեև գնահատման այս բաղադրիչով պատկերը համեմատաբար բավարար է, այդուամենայնիվ հանձնարարել է առավել հետևողական ու խիստ լինել ապօրինի շինությունների կառուցման կանխարգելման, դրանց հայտնաբերման ու անհապաղ ապամոնտաժման հարցում:
Տարոն Մարգարյանը անդրադարձել է նաև քաղաքապետարան-վարչական շրջան-համատիրություններ եռաստիճան կառավարման ուղղությամբ տարված աշխատանքների արդյունքներին ընդգծելով, որ հատկապես վերջինի աշխատանքի արդյունավետության բարձրացման ուղղությամբ դեռ բավականին անելիք կա: Քաղաքապետը նկատել է, որ անհրաժեշտ է առավել ինտենսիվ աշխատանք տանել բազմաբնակարանների սեփականատերերի իրավունքների և պարտավորությունների իրազեկվածության բարձրացման ուղղությամբ. «Ողջ գործընթացը, սկսած գումարների հավաքագրումից մինչև արդյունավետ տնօրինում, պետք է վերահսկեն իրենք` շենքերի բնակիչները: Որպեսզի գործնականում այս դաշտում ունենանք շոշափելի արդյունք, անհրաժեշտ է ամենօրյա հետևողական աշխատանք իրականացնել թե բնակիչների և թե համատիրությունների հետ»,-շեշտել է Տարոն Մարգարյանը:
Ամփոփելով մայիս ամսվա ընթացքում վարչական շրջանների կատարած աշխատանքների գնահատման և վերլուծության արդյունքները, քաղաքապետ Տարոն Մարգարյանը նաև նկատել է, որ բացի վերոնշյալ գնահատումից վարչական շրջաններ կատարած պարբերական աշխատանքային այցերի շրջանակում անձամբ է հնարավորություն ունենում հենց տեղում տեսնելու և գնահատելու կատարած աշխատանքն ու ըստ այդմ հանձնարարել է առավել հետևողական լինել տարեկան ծրագրերով նախանշված աշխատանքների սահմանված ժամանակացույցով և որակով կատարման ապահովման ուղղությամբ: «Բազմիցս նշել եմ, որ մայրաքաղաքում իրականացվող աշխատանքների ամենաարդարացի գնահատականը մեր բնակիչներն են տալիս: Բնակչության հետ շփման առաջին օղակը վարչական շրջանների աշխատակազմերն են և նրանց աշխատանքով է պայմանավորված բնակիչների վերաբերմունքը քաղաքային իշխանությունների նկատմամբ: Եվ ուրեմն եղեք հետևողական ու աշխատեք այնպես, որ մեր համաքաղաքացիները չդժգոհեն կատարված աշխատանքի արդյունքից:»,-շեշտել է Տարոն Մարգարյանը:
Վերջում քաղաքապետը նաև հիշեցրել է, որ ինչպես և խոստացվել էր, արդեն հուլիսին վարչական շրջանների աշխատանքի գնահատման և վերլուծության ցուցանիշների կիսամյակային ամփոփման արդյունքներով լավագույն ցուցանիշներ արձանագրած վարչական շրջանների և նրանց աշխատակազմերի համար կկիրառվեն խրախուսման մեխանիզմներ, ինչն իր հերթին արդյունավետ խթան կհանդիսանա նաև մյուսների համար:
