Facebook սոցիալական ցանցը պատրաստվում է Նյու Յորքի հարավային շրջանի դատարան ուղարկել խնդրագիր՝ միավորելու բորսային գործարքից դժգոհ ներդրողների հայցերը մեկ գործում: Այս մասին գրում է The New York Times-ը՝ հղում անելով անանուն աղբյուրներին:
Ինչպես սպասվում է, խնդրագրին կմիանան բորսային շուկայում Facebook-ի բաժնետոմսերի բաշխման կազմակերպիչներ Morgan Stanley-ն, Goldman Sachs-ը և JPMorgan Chase-ը: Պարբերականի աղբյուրների տվյալներով՝ սոցցանցը կարող է անհաջող IPO-ի մեղքի մի մասը բարդել Nasdaq բորսայի վրա:
Facebook-ի արժեթղթերի մուտքը բորսային շուկա տեխնիկական խնդիրների պատճառով տեղի է ունեցել կես ժամ ուշացումով: Դրա պատճառով ներդրողների մի մասը վնասներ են կրել, որոնց չափը, տարբեր գնահատականներով, կարող է հասնել 100 միլիոն դոլարի: Առևտրականները բողոքում են, որ խափանման պատճառով իրենց արժեթղթերը ուշ են վաճառել, երբ դրանց գինն արդեն ընկել է:
Մեկ շաբաթ առաջ բորսան, որոշելով փոխհատուցել վնասները, ներդրողների կորուստը գնահատել է 40 միլիոն դոլար: Nasdaq-ը կփոխհատուցի այն ներդրողներին, որոնք փորձել են վաճառել բաժնետոմսերը 42 դոլարով կամ ավելի ցածր գնով: Դժգոհ ներդրողները դատական հայցեր են ներկայացրել ոչ միայն ցանցի, այլև բորսայի դեմ:
Ինչպես գրում է The Wall Street Journal-ը, դատարանում ներդրողների հաղթանակի հնարավորությունները մեծ չեն: Nasdaq-ն առաջին անգամ չէ, որ պետք է հաղթի տեխնիկական խնդիրների պատճառով հարուցված գործում: Կոլումբիայի իրավաբանական դպրոցի պրոֆեսոր Ջոն Քոֆիի խոսքով՝ դա նման է հեռախոսային օպերատորի դեմ ներկայացված հայցի, որն անհասանելի է եղել վթարի ժամանակ, և վթարի մասնակիցները չեն կարողացել շտապօգնություն կանչել:
