Հայաստանում վերջին տարիներին վարձավճարները տարեցտարի բարձրանում են: Չնայած այն հանգամանքին, որ ուսանողները բուհ ընդունվելուց տվյալ ուսումնական հաստատության հետ նախնական պայմանագիր են կնքում, որ իրենք ընդունվել եւ ավարտելու են տվյալ տարում սահմանված իքս վարձավճարով: Հայաստանի Հանրապետությունում այս տարվա տվյալներով գործում են 77 պետական եւ ոչ պետական ուսումնական հաստատություններ եւ 12 մասնաճյուղ: Հայաստանում գործող բուհերում 2009-2010 ուսումնական տարում սովորել է 114629 ուսանող, որոնց 20.6 տոկոսն է ընդամենը անվճար հիմունքներով սովորում:Ի դեպ, մասնավոր համալսարանները, քանի որ ուսանողներին գրավելու խնդիր ունեն, այստեղ վարձավճարի թանկացումները պայմանավորված են եղել միայն դոլար- դրամ փոխարժեքի փոփոխությամբ: Երեւանի պետական համալսարանի հաշվապահությունից տեղեկացանք, որ մայր բուհում միայն հեռակա բաժիններում են գները թանկացել: Եթե Իրավագիտություն բաժնում սովորելու համար ուսանողները 2007թ. վճարել են 450 հազար դրամ, ապա 2010-ին ստիպված են վճարել 560 հազար դրամ: Մանկավարժական համալսարանի ֆինանսական բաժնից տեղեկացանք, որ այստեղ 2007թ.-ից մինչ օրս ուսման վարձավճարները բարձրացել են առավելագույնը 11 տոկոսով, ինչը պայմանավորված է հանրապետությունում տեղի ունեցող թանկացումներով: Պոլիտեխնիկի պրոռեկտոր Լաերտ Հովհաննիսյանն էլ նշեց, որ իրենց մոտ ուսման վարձավճարները թանկացել են 5 տոկոսով, իսկ 2007թ.-ից մինչ օրս` 10 տոկոսով: Իսկ թանկացման պատճառները, ըստ նրա, շատ պարզ են. «Ջուրը թանկացել է, լույսը թանկացել է»,- փորձեց պարզաբանել պրոռեկտորը: Մեր այն հարցին, թե առաջիկայում սպասվում են գների բարձրացումներ, ավելացրեց. «Մյուս տարի դիմորդները շատ քիչ են լինելու: Ներողություն արտահայտությանս համար, բայց մյուս տարի ընդամենը երկու գյուղ դիմորդ է լինելու, հետեւաբար` բարձրացումներ էլ չեն սպասվի»:
