Եվրախորհրդարանն այսօր որոշում է կայացրել սառեցնել եվրոպական պետությունների կառավարությունների հետ բանակցութունները հատկապես 5 օրինագծերի մասով, որոնց ընդունումը թույլ կտա փոփոխություններ կատարել Շենգենյան օրենսդրությունում: Այս մասին հայտնում է Agence France-Presse-ը` հղում կատարելով ասամբլեայի նախագահ Մարտին Շուլցին:
Եվրախորհրդարանականների որոշման վրա ազդել է ԵՄ արդարադատության ու ներքին գործերի խորհրդի դիրքորշումը, որը մեկ շաբաթ հանդես էր եկել հայտարարությամբ՝ կոչ անելով, որ Եվրախորհրդարանը դուրս գա Շենգենյան օրենսդրության արդյունավետության համատես գնահատման ընթացակարգից ու դրանում փոփոխություններ կատարելուց:
Խորհրդարանականների կարծիքով` գործնականում դա նշանակում է հնարավորություն` անտեսել ասամբլեայի դիրքորոշումը, որը ԵՄ-ի միակ ինստիտուտն է, որն ընտրվում է ընկերակցության երկրների քաղաքացիների կողմից:
«Այդ որոշումը նախադեպը չի ունեցել իմ նախագահության 18 տարիներին: Դա արմատական որոշում է` ի պատասխան խորհրդի (ԵՄ-ի)»,- լրագրողներին հայտարարել է Շուլցը:
Նա հավելել է, որ ԵՄ խորհուրդը` որպես գործադիր մարմին «չի կարող սպասել, որ Եվրախորհրդարանը պարզապես մի կողմ կքաշվի այդ հարցից»:
Հիշեցնենք, որ Եվրախորհրդարանի քաղաքացիական հարցերով կոմիտեն այս տարվա ապրիլին հավանություն է տվել օրենսդրական փոփոխություններին, համաձայն որոնց` Շենգենյան համաձայնագրի մասնակից-երկրներին իրավունք է ընձեռվում մինչև 10 օրով հսկողություն սահմանել իրենց սահմաններում, եթե ծագեն ներքին անվտանգության ու հասարակական կարգի պահպանման հետ կապված խնդիրներ: