Կիրակի` փետրվարի 6-ի առավոտյան ժամը 4-ից փակ է Երևան-Մեղրի միջպետական ճանապարհի Գորիս-Սիսիան հատվածը: Չնայած տեղումներ չկան, սակայն ուժեք բուք է ու քամի: Ճանապարհի եզրերից ուժեղ քամին ձյունը լցնում է ճանապարհի վրա:
Մեր ունեցած տեղեկություններով, մոտ հարյուրից ավելի ավտոմեքենա մնացել է ճանապարհին: Ինչպես «Առաջին լրատվականին» հայտնեցին ճանապարհի այդ հատվածը սպասարկող Գորիսի «Ոսմար» ընկերության հերթապահությունից, ընկերության ողջ տեխնիկան և աշխատակիցները այդ վայրում են: Սակայն ժամը 16.00-ի դրությամբ դեռ չի հաջողվել բացել ճանապարհը: Թե՛ մայրաքաղաքից ու թե՛ մարզի այլ քաղաքներից արդեն արգելում են մեքենաներին ուղևորվել: Թե երբ հնարավոր կլինի բացել միջպետական ճանապարհը, ոչ ոք չի կարող ասել: Ճանապարհին գտնվող ուղևորները «Առաջին լրատվականի» հետ ունեցած հեռախոսազրույցում նշեցին, որ մեքենաներում են, մրրիկ է, ու դրսում ոչինչ չի երևում: Այս պահի դրությամբ տուժածներ չկան:
Ներկա դրությամբ տվյալ հատվածում ձյան շերտը կես մետրից ավելին է:
