Kurdishcenter.ru-ի փոխանցմամբ՝ արդեն ավելի քան 320 օր է, ինչ 1999 թվականից Մարմարա ծովի Իմրալը կղզում ցմահ ազատազրկում կրող քուրդ առաջնորդ, PKK-ի հիմնադիր Աբդուլլահ Օջալանի փաստաբանները չեն կարողանում հանդիպել նրա հետ: Վերջին անգամ դա տեղի է ունեցել 2011 թվականի հուլիսի 27-ին:
Ամեն անգամ, երբ փաստաբանները ցանկանում են հանդիպել Օջալանի հետ, թուրքական իշխանությունները, հնարելով տարբեր պատճառներ, շարունակում են Օջալանին պահել լրիվ մեկուսացման մեջ: Հաճախ մեջբերվող այդպիսի պատճառներից են մոտորանավակի անսարքությունն ու եղանակային պայմանները, որոնք Օջալանի փաստաբաններին հնարավորություն չեն տալիս հասնել Իմրալը կղզի:
Այսօր էլ Օջալանի փաստաբաններն հերթական անգամ դիմել են Բուրսայի դատախազություն և Իմրալըի տնօրինություն՝ խնդրելով թույլ տալ Օջալանի հետ հանդիպում:
Հիշեցնենք, որ նախորդ տարվա օգոստոսի 17-ին Ստամբուլի դատարանը PKK-ին աջակցելու համար Օջալանին 1 տարի ժամկետով արգելել էր հանդիպումներ ունենալ իր փաստաբանների հետ, որոնց միջոցով նա տարբեր հայտարարություններ էր հնչեցնում: Օջալանի փաստաբանները վերջին անգամ նրա հետ հանդիպել են 2011 թվականի հուլիսի 27-ին և այս տարվա ապրիլի վերջի դրությամբ՝ ստացել են Օջալանի հետ հանդիպելու 67-րդ մերժումը: Ի դեպ, Օջալանին բանտում պահելը թուրքական պետությանը տարեկան արժենում է 25 միլիոն դոլար: