Սկեսուրի կողմից դաժանաբար ծեծի ու կտտանքների ենթարկված Մարիամ Գևորգյանի գործով Արարատի մարզի ընդհանուր իրավասության դատարանում այսօրվա դատական նիստը կրկին անցկացվել է դռնփակ պայմաններում:
Փաստորեն, դատավարությունը հրապարակայնորեն անցկացնելու վերաբերյալ միջնորդությունը դատարանը կրկին հաշվի չի առել, իսկ նախագահականը երևի չի էլ ծանոթացել երկու օր «Ընդդեմ կանանց նկատմամբ բռնության» կոալիցիայի կազմակերպած ցույցից հետո նախագահական ուղարկված հայտարարությանը, որով բողոքող Մարիամի համագյուղացիներն ու կոալիցիայի անդամները պահանջել էին բռնության ենթարկված կնոջ գործով բաց դատավարություն:
Հիշեցնենք, որ Մարիամի ամուսին Դավիթ Զիրոյանի նկատմամբ մեղադրանք էր առաջադրվել` ՔՕ «Դիտավորությամբ ուրիշի առողջությանը միջին ծանրության վնաս պատճառելու» (բայց առանց «առանձնակի դաժանության») և «Ծեծ» հոդվածների հատկանիշներով, սակայն նրա նկատմամբ կիրառվել էր համաներում, ու նա այժմ ազատության մեջ է: Իսկ սկեսուրը` Հայկանուշ Միքայելյանը, կալանավորված է։ Նրա նկատմամբ մեղադրանք էր առաջադրվել Քր.Օր-ի 113 հոդվածի 2-րդ մասի 5-րդ կետով (առանձնակի դաժանությամբ, դիտավորությամբ առողջությանը միջին ծանրության վնաս պատճառելը) և 119-րդ հոդվածի 2-րդ մասի 6-րդ կետով (առանձնակի դաժանությամբ խոշտանգում):
