Ադրբեջանական Trend լրատվական գործակալության փոխանցմամբ՝ ԵԱՀԿ գործող նախագահ Էյմոն Գիլմորը Ադրբեջանի արտգործնախարար Էլմար Մամեդյարովի հետ հանդիպումից հետո Բաքվում կազմակերպված մամուլի ասուլիսի ժամանակ անդրադարձել է Ղարաբաղյան հակամարտության կարգավորմանը.
«ԵԱՀԿ-ն հակամարտող կողմերին կոչ է անում շարունակել «հիմնարար սկզբունքների» վրա տարվող աշխատանքները, հրաժարվել ուժի գործադրումից, ինչպես նաև շփման գծից հեռացնել դիպուկահարներին: Եկել է ժամանակը՝ հակամարտող կողմերի միջև վստահության միջոցներ կառուցելու համար:
ԵԱՀԿ-ն աջակցում է Մինսկի խմբի ջանքերը: ԵԱՀԿ-ն բոլոր որոշումներն ընդունում է կոնսենսուսի հիման վրա: Դա 56 մասնակից երկրներով աշխարհի միակ կազմակերպությունն է, որը համաձայնության է գալիս կոնսենսուսի հիման վրա: ԵԱՀԿ-ն ունի հակամարտությունների խաղաղ կարգավորման հստակ սկզբունքներ:
Հենց դրա համար էլ մենք ստեղծել ենք սկզբունքների հավաքածու, որի հիման վրա կարող է կարգավորվել Ղարաբաղյան հակամարտությունը: Այդ սկզբունքները պետք է համաձայնեցնել շահագրգիռ երկրների հետ: ԵԱՀԿ-ն շարունակելու է աշխատել, որ հակամարտող կողմերը հասնեն Ղարաբաղյան հակամարտության խաղաղ կարգավորմանը»:
