Ձմռան վերջին ամսվա ձյունառատ առաջին օրերը Քաջարանի քաղաքապետարանը որոշել էր հաճելին համատեղել օգտակարի հետ: Շաբաթ օրը մեծ ու փոքր քաջարանցիներ մասնակցեցին «Քաջարանյան ձմեռ-2011» միջոցառմանը:
Ըստ քաղաքապետի` սա և՛ առողջությանն է օգտակար, և՛ մարդկանց համար հետաքրքիր ժամանց է: Ի դեպ, քաղաքապետարանը հոգացել էր ինչպես սննդի, այնպես էլ շարժական զուգարանների հարցը: Երգ-երաժշտություն, մարզական խաղեր, ընտանեկան մրցումներ, քաջարանցիները ձնից նույնիսկ Մասիս սարն էին «քանդակել»:
«Առաջին լրատվականի» հարցին, թե ինչո՞ւ հենց Մասիսը, ոչ թե քաջարանյան Կապուտջուղը` հեղինակները պատասխանեցին, որ խորհուրդ կա: «Կապուտջուղը մերն է, իսկ Մասիսը օտարության մեջ է, սրանով էլ ենք ուզում հավաստիացնել, որ Մասիսը մի օր մերն է լինելու: Ու դա քաջարանցիներն են հետ բերելու»,-ասացին թիվ 1 դպորցի 10 «բ» դասարանի աշակերտները: Վերջում էլ նրանք գրավեցին Մասիսը` «հանգստանալով» լանջերին: Նկատենք, որ քաջարանյան ձմեռն անցկացվեց Զանգեզուրի պղնձամոլիբդենային կոմբինատի նախկին թափոնատարի տարածքում: Այլևս այստեղ վտանգ չկա, պոչամաբարը տարիներ առաջ ենթարկվել է ռեկուլտիվացիայի:
Բացի Քաջարանից, Գորիսում էլ նույն տրամադրությունն էր: Գորիսյան ձմեռն էլ կազմակապերպել էր Գորիսի քաղաքապետարանը:
