Հելսինկիում 4 ամսվա պայմանական ազատազրկման է դատապարտվել ՌԴ-ում արգելված «Կովկաս-կենտրոնի» գլխավոր խմբագիր Միքայելա Ստորշոն, ով մեղավոր է ճանաչվել Ֆինլանդիա անօրինական կերպով չեչեն ներգաղթյալներ ուղարկելու համար: Այս մասին այսօր հայտնում է Interfax-ը:
Ապացուցվել է, որ Ստորշոն կազմակերպել է Ֆինլանդիա երեք խումբ չեչեն, անօրինական ներգաղթյալների մուտքը` ընդհանուր առմամբ` 25 մարդու (ի սկզբանե, խոսքը 100 ներգաղթյալի մասին էր):
Նրանք երկիր էին ներթափանցել Թուրքիայի միջոցով: Ֆինն իրավապաշտպան Իոխան Բեքմանն Interfax-ի հետ զրուցում նշել է, որ այդ չեչենների թվում են եղել ահաբեկիչներ Շամիլ Բասաևի, Դոկու Ումարովի ազգականներ:
Ստորշոյի օգնությամբ Ֆինլանդիա է ներթափանցել նաև Մացիև ազգանունով մի մարդ, որին համարում են բեսլանյան ահաբեկիչների նախկին ռադիոօպերատոր: Բեքմանի տվյալներով` ներկայում Մացիևը աշխատում է «Կովկաս-կենտրոնի» ադմինիստրացիայում:
2011թ. Վանտաա քաղաքի դատարանը Ստորշոյին արդարացրել է, սակայն մեղադրող կողմը բողոքարկել էր դատավճիռը Հելսինկիի դատարանում, որը ներկայում նրան մեղավոր է ճանաչել:
