Այսօր` հունիսի 13-ին, ավտովթար է տեղի ունեցել Գեղարքունիքի մարզում:
Ինչպես News.armeniatv.com-ին հայտնել է ֆոտոլրագրող Գ. Շամշյանը` 00:40-ի սահմաններում «ՎԱԶ 2115» մակնիշի 09 ԼՏ 231 համարանիշի մեքենայի վարորդը Մարտունու տարածաշրջանի Վարդենիկ գյուղի գյուղամիջյան ճանապարհին բախվել է երկաթե խողովակին: Վթարի հետևանքով մեկ հոգի մահացել, իսկ 4 հոգի մարմնական վնասվածքներով տեղափոխվել են Մարտունու բժշկական կենտրոն:
Մահացածը մոտ 20-23 տարեկան է: Վիրավորները նույնպես երիտասարդներ են:
Դեպքի վայր են ժամանել ճանապարհային ոստիկանության երկորդ սպայական գումարտակի չորրորդ վաշտի աշխատակիցները` հրամանատար Սերգեյ Հակոբյանի գլխավորությամբ:
Տեղում է նաև նույն վաշտի վարչական գործունեության ավագ տեսուչ Հովսեփ Հարեյանը: Վթարի վայրում քննչական աշխատանքները ղեկավարում է Ոստիկանության Քննչական գլխ վարչության Գեղարքունիքի մարզի քննչական բաժնի Մարտունու քննչական բաժանմունքի քննիչ Արթուր Ավագյանը:
Այս պահին ոստիկանության կողմից ձեռնարկվում են օպերատիվ քննչական միջոցառումներ` պարզելու վարորդի, մահացած անձի և վիրավորների ինքնությունը:
