Թունիսում մտցվել է պարետային ժամ։ Այն կգործի ութ շրջաններում, այդ թվում՝ մայրաքաղաքում։ Այս մասին ասվում է պաշտպանության և ներքին գործերի նախարարության համատեղ հայտարարությունում։ Պարետային ժամը գործելու է ամեն օր, ժամը 21։00-05։00-ը։ ITAR-TASS-ի փոխանցմամբ` այս քայլին իշխանությունները գնացել են այն բանից հետո, երբ երկրով մեկ տեղի են ունեցել անկարգություններ, որոնք կազմակերպվել են ծայրահեղական իսլամիստների կողմից։
Հայտնի է, որ նախորդ գիշեր սալաֆիները բողոքել են Թունիս քաղաքում կազմակերպված գեղարվեստական ցուցահանդեսի դեմ, որն ըստ սալաֆիների՝ վիրավորում է իսլամը։ Բախումները տեղի են ունեցել տարբեր քաղաքներում։ Ինչպես հաղորդում է France Presse գործակալությունը, ձերբակալվել է 160 մարդ։ Թունիսի արդարադատության նախարարությունն այս ելույթները որակել է որպես ահաբեկչություն, և նախարարի խոսքերով՝ ձերբակալվածները կդատվեն համաձայն 2003թ․-ին ընդունված ահաբեկչության մասին օրենքի։
