«Կարևոր է այն փաստը, որ այդ նախաձեռնությունը (հակահրթիռային պաշտպանության համակարգերի տեղակայումը,- խմբ.) պատկանում է ամերիկացի 4 հանրապետական սենատորների և հույս ունենք, որ այլ հանրապետական սենատորներ նույնպես կաջակցեն նախաձեռնությանը, քանի որ միջանկյալ ընտրություններից հետո հանրապետականների ազդեցությունը Սենատում մեծացել է»,- կարծում է վրացի փորձագետ Նիկա Չիտաձեն:
Грузия-online-ի հետ զրույցում նա դրական է գնահատել ամերիկյան այս նոր մտահղացումը:
Վրացի մեկ այլ փորձագետ` Կախա Գոգոլաշվիլին հույս է հայտնել, որ հրթիռները, տեղակայվելու դեպքում, էապես կամրապնդեն երկրի անվտանգությունը, քանի որ «այդ հրթիռները անհրաժեշտ կլինեն ցանկացած հակահրթիռային պաշտպանության համար»:
Նրա կարծիքով, Միացյալ Նահանգները ավելի հիմնավոր կսկսի մտածել նման համակարգերի տեղակայման մասին, եթե Ռուսաստանը հրթիռային համակարգեր տեղակայի Հարավային Օսեթիայի կամ Աբխազիայի տարածքում:
Հիշեցնենք, որ մամուլում երեկ տեղեկություններ էին տարածվել այն մասին, որ ԱՄՆ Սենատի 4 անդամներ նախագահ Օբամային և պաշտպանության նախարար Ռոբերտ Գեյթսին նամակ են հղել, որում պահանջել են Իրանից պաշտպանվելու համար նախատեսված հակահրթիռային պաշտպանության համակարգերը Թուրքիայի փոխարեն տեղակայել Վրաստանում: Պատճառը` Թուրքիայի առաջ քաշած նախապայմանն է, որի համաձայն` ամերիկացի զինվորականները պետք է տեղակայվելիք համակարգի հավաքագրած ոչ մի տեղեկություն չտրամադրեն Իսրայելին:
