ԱԺ չարաբաստիկ ընտրություններից հետո Հայաստանը գտնվում է մի նոր փուլում. այսօր լրագրողների հետ հանդիպմանը ասաց ԱԺ Հայ ազգային կոնգրես խմբակցության ղեկավար, ՀԱԿ համակարգող Լևոն Զուրաբյանը:
«Մենք ունենք 7 հոգանոց ֆրակցիա, որի գործունեությունը լինելու է ժողովրդի շահերի ներկայացումը: Մենք ԱԺ-ում հանդես կգանք կոռուպցիոն բացահայտումներով, անխնա կքննադատենք իշխանությունների գործողությունները»,- ասաց նա:
Զուրաբյանի խոսքով՝ իրենք հասնելու են այն բանին, որ ցանկացած քաղաքացի մտնի ՀԱԿ-ի այս կամ այն գրասենյակ` իմանալով, որ իր ներկայացրած խնդիրը բարձրաձայնվելու է խորհրդարանում: «Մենք պատրաստ ենք տանել այդ բեռը»,- ասաց նա:
Զուրաբյանը տեղեկացրեց, որ ՀԱԿ ավելի քան 2000 անդամի ուղարկել են վերապատրաստման` ընտրական հանձնաժողովներում գրագետ աշխատելու նպատակով:
«Սա լրացուցիչ միջոց է պետականորեն կատարվող ընտրակեղծիքների դեմ: ՀԱԿ-ը դառնում է ընդդիմություն, որը պետք է մասնակցի բոլոր ընտրություններին: Մենք, սակայն, չենք լինելու կլասիկ խորհրդարանական քաղաքական ուժ և շարունակելու ենք հանրահավաքները:
Եթե ՀՀ-ում ազատ ու արդար ընտրություններ տեղի ունենային, ՀԱԿ-ը խորհրդարանում կունենար առնվազն 40-50 պատգամավոր: Նման դեպքում մենք կդադարեցնեինք հանրահավաքային պայքարը` սահմանափակվելով միայն խորհրդարանական ամբիոնով: Սակայն քանի որ այդպես չստացվեց, մենք մեր պայքարը զուգորդելու ենք ԱԺ աշխատանքի հետ: Մեր հնարավորությունները ի չիք դարձան ահաբեկման, կեղծիքների արդյունքում»,- ասաց նա:
Անդրադառնալով հունիսի 26-ին կայանալիք ՀԱԿ հանրահավաքին` Լևոն Զուրաբյանը տեղեկացրեց, որ այդ օրը բավական լուրջ ասելիք ունեն ժողովրդին, անդրադարձ է կատարվելու նաև կառավարության հարցին:
ՀԱԿ համակարգողը անդրադարձավ նաև ԱԳ նախկին նախարար Վարդան Օսկանյանին ԱԱԾ հարցաքննության կանչելու փաստին՝ ասելով. «Եթե մենք ապրեինք դեմոկրատական պետությունում, սա կարող էր օրինաչափ գործընթաց դիտվել: Բայց քանի որ ապրում ենք մի պետությունում, որի պատկերը լավ գիտենք, չեմ զարմանա, եթե պարզվի, որ այս ամենը պայմանավորված է քաղաքական դրդապատճառներով: Այսօր թեմայի շուրջ կասեմ միայն այսքանը»:
