Հունիսի 7-ին Բուենոս-Այրեսի կառավարության մշակույթի նախարարության ոսկեզօծ դահլիճում կայացել է Դիանա Տեր-Կարապետյանի «Յաները արգենտինյան արվեստում» («Los ian en el arte argentine contemporaneo») գրքի շնորհանդեսը: Շնորհանդեսին ներկա էին Բուենոս-Այրեսի կառավարության մշակույթի նախարար Էրնան Լոմբարդին և Արգենտինայում ՀՀ դեսպան Վահագն Մելիքյանը, ինչպես նաև արգենտինյան իշխանությունների ներկայացուցիչներ, արգենտինահայ կառույցների ղեկավարներ և հոգևոր առաջնորդներ:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ Էրնան Լոմբարդին իր ելույթում կարևորել է նման գրքի հրատարակումը, ինչպես նաև ներկաների հետ կիսել վերջերս Հայաստան կատարած այցի տպավորությունները:
Դիանա Տեր-Կարապետյանը, ներկայացնելով գրքի ստեղծման նախապատմությունը և գաղափարը, նշել, որ այն կյանքի է կոչվել ՀՀ մշակույթի նախարար Հասմիկ Պողոսյանի Բուենոս-Այրես կատարած այցի ընթացքում:
Արգենտինայում ՀՀ դեսպան Վահագն Մելիքյանը մեծապես կարևորել է նման նախաձեռնությունները:
Նա,մասնավորապես, նշել է այն բարենպաստ պայմանները, որ թույլ են տվել մեր հայրենակիցներին լիովին ինտեգրվել արգենտինյան հասարակության մեջ և ինքնադրսևորվել նաև արվեստի բնագավառում:
Շնորհանդեսի գեղարվեստական հատվածում ելույթ են ունեցել արգենտինահայ երգիչներ:
