Վրացական Interpressnews լրատվական գործակալության փոխանցմամբ՝ ձախողվել է Վրաստանում ավանդաբար անցկացվող Սևծովյան երկրների կրթական միջազգային կոնֆերանսի անցկացումը: Դրա պատճառը Վրաստանի Ազգային միասնական քննական կենտրոնի ղեկավարի պաշտոնից Մայա Միմինոշվիլիի հեռացումն է, որի եղբայրն ու որդին չեն թաքցնում իրենց ընդդիմադիր հայացքները:
Միջազգային կազմակերպչական կոմիտեն հրաժարվել է կոնֆերանսի անցկացումից, քանի որ համայն աշխարհում ճանաչված կրթական ոլորտի փորձագետները հրաժարվել են ժամանել Վրաստան՝ դրանով իսկ իրենց անհամաձայնությունը հայտնելով Միմինոշվիլիի հեռացմանը:
Եվրոպական կրթական ասոցիացիաների ղեկավար Սթիվեն Բակերն այդ հրաժարականը պայմանավորել է Վրաստանի ծանր քաղաքական իրավիճակով: Նա ընդգծել է, որ Միմինոշվիլիի հեռացումից հետո այդ կենտրոնի 60 աշխատակիցներ, որպես բողոքի նշան, հեռացել են աշխատանքից:
Միջազգային կոնֆերանսը պետք է անցկացվեր Բաթումում: Դրան պետք է մասնակցեին 12 երկրների ներկայացուցիչներ: Այդպիսի ֆորումներն անցկացվում են տարեկան 3 անգամ:
