Թուրքական Sabah թերթի փոխանցմամբ՝ թուրքական առաջին հետախուզական անօդաչու թռչող սարքը (ANKA) թուրքական բանակի սպառազինության մեջ կհայտնվի հունիսի վերջին: Այդ ԱԹՍ-ն հայտնվել է հարևան երկրների ուշադրության կենտրոնում:
Այս մասին հայտարարել է թուրքական պետական աերոտիեզերական արդյունաբերության ընկերության (TUSAŞ) գլխավոր տնօրեն Մուհարեմ Դերթքաշլըն: Նրա խոսքերով՝ ANKA-ն գնելու հարցում հետաքրքրություն են ցուցաբերել Պարսից ծոցի երկրները, Պակիստանը, ասիական մի շարք երկրներ, որոնց թվում են նաև թյուրքական երկրները: Նա հավելել է, որ մի շարք երկրների պարագայում Թուրքիան գտնվում է համապատասխան համաձայնագրերի կնքման փուլում:
ANKA-ի վրա տարվող աշխատանքները Թուրքիայում մեկնարկել են 2004 թվականին: Նախագծի վրա աշխատել են 180 ինժեներներ: Այս ԱԹՍ-ն դասվում է միջին բարձրություններում թռչող և թռիչքի մեծ տևականություն ունեցող ԱԹՍ-երի դասին: ANKA-ն տվյալ ոլորտում Թուրքիայի ինքնուրույն մշակած առաջին ԱԹՍ-ն է:
