Իռլանդիայի Հանրապետության փոխվարչապետ և ԱԳ նախարար Էեմոն Գիլմորի` ԼՂ հակամարտության հետ կապված ուղերձը մեկն է` հակամարտության երկու կողմերն էլ պետք է աշխատեն լուրջ քայլեր ձեռնարկել խնդիրը լուծելու ճանապարհին: Այսօր կայացած մամուլի ասուլիսի ժամանակ այս մասին ասաց ինքը` Էեմոն Գիլմորը:
«Կոչ եմ անում ձեռնպահ մնալ ուժի կիրառումից կամ ուժի կիրառման սպառնալիքից: Խնդիրը չի կարող լուծվել ուժի կիրառմամբ: Մենք պետք է առաջընթաց տեսնենք: Կողմերն իրենց հերթին պետք է պատրաստ լինեն՝ դիմելու փոխզիջումների: ԵԱՀԿ-ն պատրաստ է սատարել՝ հասնելու դրան: ԵԱՀԿ-ն կարող է օգնել, որ ժողովուրդների միջև կամուրջներ գցվեն, կարող է սատարել հակամարտող կողմերին, սակայն չի կարող նրանց որևէ բան ստիպել կամ պարտադրել»,- ասաց նա:
Իռլանդիայի ԱԳ նախարարի խոսքով՝ ԼՂ հակամարտության կողմերը պետք է սահմանից հեռացնեն դիպուկահարներին, չկրակեն, որպեսզի պատասխան կրակ չլինի: Բացի այդ, պետք է հետաքննվի շփման գծում տեղի ունեցող յուրաքանչյուր միջադեպ:
«Ես սատարում եմ նմանօրինակ մեխանիզմի մշակումը: Հետաքննությունների մեխանիզմի ներդրումը շատ օգտակար կլինի: Հարկ է ունենալ անկախ մեխանիզմներ, որոնք կարող են ապահովել այս գործը: Մենք իսկապես ցանկանում ենք նման մարմին ստեղծել, քանի որ այս տարածաշրջանում ապրող մարդիկ արժանի են խաղաղության և կայուն ստատուս քվոյի: Հանուն ԼՂՀ-ում և տարածաշրջանում կայուն խաղաղության մենք պատրաստ ենք աջակցություն ցուցաբերել կողմերին»,- ասաց նա:
Հարցին` ինչո՞ւ անձամբ չի այցելում ԼՂՀ, Էեմոն Գիլմորը նկատեց, որ որպես ԵԱՀԿ գործող նախագահ` ինքն ընդամենը սատարում է ԵԱՀԿ Մինսկի խմբի համանախագահների աշխատանքներին:
«Իմ այցը Հայաստան և Ադրբեջան ուղղված է այս ուղերձը շատ հստակ տեղ հասցնելուն: Միաժամանակ հույս ունեմ, որ Փարիզում կայանալիք Հայաստանի և Ադրբեջանի ԱԳ նախարարների առաջիկա հանդիպումը կօգնի նոր կյանք պարգևել բանակցային գործընթացին»,- ամփոփեց նա: