Грузия Online-ի փոխանցմամբ՝ Հարավային Կովկասում ու Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ափաթուրայը երեկ Թբիլիսիում հանդիպել է Վրաստանի արտգործնախարար Գրիգոլ Վաշաձեի հետ: Վրաստանի ԱԳՆ-ում տեղի ունեցած այդ հանդիպումը տևել է մոտ մեկ ժամ:
Հանդիպումից հետո Ափաթուրայը հայտարարել է. «Վրաստանը դիտարկվում է որպես ՆԱՏՕ-ի ապագա անդամ, և դա մեծ հաջողություն է: Հանդիպման ժամանակ մենք քննարկեցինք Չիկագոյի գագաթնաժողովի արդյունքները և ընդգծեցինք այն կարևոր փաստը, որ Վրաստանը, 30 այլ երկրների հետ մեկտեղ, ներկայացված էր գործընկեր-երկրի կարգավիճակով:
Այդ գագաթնաժողովում խոսք չի գնացել ՆԱՏՕ-ի ընդլայնման մասին: Քննարկվել են անվտանգությանն առնչվող և այդ ուղղությամբ համագործակցության ուժեղացման հարցը: Չնայած նրան, որ ՆԱՏՕ-ի ընդլայնման հարցը չի դիտարկվել, կարևոր է, որ Վրաստանը մասնակցեց այդ գագաթնաժողովին: Վրաստանը դիտարկվում է որպես ՆԱՏՕ-ի ապագա անդամ, և դա՝ շնորհիվ այն բարեփոխումների, որոնք անցկացվել են այդ երկրում: ՆԱՏՕ-ն ու Վրաստանը համատեղ աջակցելու են տարածաշրջանի անվտանգությանը»:
