Նյու Յորքում հունիսի 10-ին տեղի է ունեցել թատերական «Թոնի» 66-րդ մրցանակաբաշխությունը: Ինչպես հաղորդում է միջոցառման կայքը, մրցանակների քանակով առաջատար է դարձել անգլիական ռեժիսոր Ջոն Թիֆֆանիի «Մի անգամ» մյուզիքլը:
Բեմադրությունը ճանաչվել է որպես լավագույն մյուզիքլ, իսկ Թիֆանին` լավագույն ռեժիսոր: Բացի այդ, «Մի անգամ» մյուզիքլում խաղացած ամերիկացի Սթիվ Կազին մրցանակ է ստացել տղամարդու լավագույն դերակատարման համար:
«Մի անգամ» մյուզիքլը պատմում է իռլանդացի երաժշտի և չեխ ներգաղթյալի սիրավեպի մասին, ովքեր հանդիպել են Դուբլինում: Իր աշխատանքի հիմքում Թիֆանին դրել է ռեժիսոր Ջոն Քարնիի իռլանդական համանուն ֆիլմը, որը 2008 թվականին լավագույն երգի համար «Օսկար» էր ստացել:
«Թոնի» մրցանակաբաշխությունն ԱՄՆ-ում ամենահեղինակավոր թատերական պարգևն է և «Օսկարի» անալոգն է: Առաջին անգամ այն հանձնվել է 1947 թվականին:
