Ամերիկյան նավթագազային Anadarko Petroleum կորպորացիան Մոզամբիկում գազի խոշոր հանք է հայտնաբերել: Ինչպես ասված է ընկերության մամլո հաղորդագրությունում, հանքում գազի պաշարները կազմում են մինչև 850 միլիարդ խորանարդ մետր:
Հանքավայրը հայտնաբերվել է Ռովումա ծովածոցում հորատման աշխատանքների ժամանակ: Ընկերությունը համարում է, որ դա իր կողմից աֆրիկյան երկրում գտնված խոշորագույն հանքավայրն է:
Այս տարվա մարտին Anadarko-ի մրցակից իտալական Eni ընկերությունը նույնպես գազի խոշոր պաշարներ էր նկատել Մոզամբիկի ափերի մոտ և Ռովումա ծովածոցում: Eni-ի հայտնաբերած ծավալները գնահատվում են 283 միլիարդ խորանարդ մետր:
Ինչպես նշում է Agence France-Presse-ը, հայտնաբերված հանքավայրերը մեծացնում են հավանականությունն առ այն, որ երկիրը կարող է դառնալ Աֆրիկայում գազի խոշորագույն արտահանողը: Anadarko-ն նախատեսում է Մոզամբիկից գազի մատակարարումները սկսել 2018-ին:
