Հայաստանի ռամկավար ազատական կուսակցությունը կարծում է, որ երկպալատ խորհրդարանի մասին հայտարարություն անելուց առաջ Սփյուռքի նախարարը նախ պետք է խորհրդակցեր սփյուռքյան ավանդական կառույցների հետ:
Ոչ ժամանակին արված այս հայտարարությունը ոչ միայն կարող է վարկաբեկել այդ գաղափարը, այլև լարվածություն ստեղծել Հայաստանի և Սփյուռքի միջև: Այս կարծիքին է ՀՌԱԿ նախագահ Հակոբ Ավետիքյանը: Այնուհանդերձ, Ավետիքյանը կողմ է երկպալատ խորհրդարան ստեղծելու գաղափարին: «Հայաստանն ու Սփյուռքը միավորելու փորձեր արվել են սկսած 70-ականներինց: Ըստ որում` այդ պահանջարկը եղել է Սփյուռքից: Այդ մասին խոսել է պրոֆեսոր Նիկոլա Հովհաննիսյանը, 2009 թ. խորհրդարանում այդ միտքը արտահայտել է Հայկ Սանոսյանը: Ինչ վերաբերում է այս հայտարարությանը, ապա սա հում գաղափար է: Տեսակի, ձևի, ներկայացուցչության բնույթի և բազում այլ հարցեր կան»,- ասում է Ավետիքյանը:
ՀՌԱԿ նախագահը հարկ է համարում փաստել, որ վերջին տարվա ընթացքում կրկնապատկվել է երկքաղաքացիների թիվը` հասնելով 18,000-ի: Երկքաղաքացիների համար սա կարող է դառնալ այն վայրը, որտեղ կարող են արտահայտել իրենց կարծիքը և մասնակցություն կունենան պետական որոշումների կայացմանը: