«Սա ծամոն է մարդկանց զբաղեցնելու համար: Պարտադիր չէ երկպալատ խորհրդարան ստեղծել Հայաստան-Սփյուռք կապ ամրապնդելու համար: Պետությունը չի կատարում Սահմանադրությամբ ընդունված պարտավորությունները: Երկպալատ խորհրդարանի ստեղծումը ՀՀ սուվերենիտետից դուրս է, հակասում է միջազգային իրավունքին»,- կարծիք է հայտնում Աշոտ Բլեյանը:
Բանախոսը նաև շեշտում է, որ, ըստ ՀՀ Սահմանադրության, պատգամավորը պետք է աշխատի մշտական հիմունքներով, իսկ սփյուռքահայերի համար դա անելը գործնականում անհնար է:
«Խորհրդարանը պարտավորություններ ունի ներսում իր քաղաքացիների հանդեպ: Ներքին խնդիրներն են կարևոր, մնացածը` ոչ իրական է, տեղին չէ»,- ասում է Բլեյանը: Հայաստան-Սփյուռք կապի ամրապնդման համար ստեղծված այլ կազմակերպությունների գործունեությունը Բլեյանը ողջունում է: «Հայաստան համահայկական հիմնադրամը, Համահայկական բանկը չեն հակասում Սահմանադրությանը, իսկ երկպալատ խորհրդարան ստեղծելու համար անհրաժեշտ կլինի սահմանադրական փոփոխություններ անել:
Ըստ Բլեյանի՝ երկպալատ խորհրդարանի ստեղծմամբ Հայաստան-Սփյուռք կապը չի ամրանա: Եթե պետությունը ապահովի իր քաղաքացիների կենսական խնդիրների լուծումը, ապա նրանք ինքները կստեղծեն ամուր կապ սփյուռքի գործընկերների հետ, կհամագործակցեն տարբեր ոլորտներում: «Քանի դեռ Հայաստանի քաղաքացիները լիարժեք չեն զգում իրենց այնպես, ինչպես Ֆրանսիայի իրենց հայրենակիցները, չենք ունենա Հայաստան-Սփյուռք միասնություն: Դրա համար պետք է մեր հարաբերությունները լինեն իրավահավասար»:
