ՀՀ փոխվարչապետի, տարածքային կառավարման նախարարի պաշտոնակատար Արմեն Գևորգյանի ղեկավարությամբ այսօր Տարածքային կառավարման նախարարությունում տեղի է ունեցել խոհրդակցություն, որին մասնակցում էին մարզպետներ, ՏԿՆ Ջրային տնտեսության պետական կոմիտեի, Ջրառ և Ջրօգտագործող ընկերությունների (ՋՕԸ) ղեկավարներ:
ՏԿՆ հասարակայնության հետ կապերի բաժնից «Առաջին լրատվական»-ին հայտնումե ն, որ քննարկվել են անխափան ոռոգման կազմակերպմանը վերաբերող հարցեր: Հաշվի առնելով, որ տարին սակավաջուր է, Ա. Գևորգյանը ՋՕԸ ղեկավարներին առաջին հերթին հորդորել է առավելագույնս կազմակերպված ջրամատակարարում իրականացնել և գյուղացիական տնտեսություններին ջուրը խնայողաբար մատակարարել ` միաժամանակ բավարարելով պահանջարկը: «Ցանկանում եմ վստահեցնել, որ թե կառավարության պատասխանատուները, թե ՋՕԸ ղեկավարներն ամեն ինչ կանեն` գյուղացիական տնտեսություններին անհրաժեշտ քանակությամբ ջուր մատակարարելու համար: Ջրամատակարարումը պետք է իրականացվի առավելագույնս կազմակերպված»,- ընդգծել է Ա. Գևորգյանը` չբացառելով, որ կարող են նաև ռեժիմային փոփոխություններ լինել և որոշ համայնքներում անցնեն գիշերային ոռոգման:
Նա ներկաների ուշադրությունը հրավիրել է այս տարի ջրամբարներում կուտակված ջրի ծավալների վրա. մասնավորապես` այս պահի դրությամբ Ախուրյանի ջրամբարում կուտակվել է 437 մլն խմ ջուր` նախորդ տարվա համեմատ 100 մլն խմ-ով պակաս, Ազատի ջրամբարում` 63 մլն խմ` անցած տարվա 70 մլն խմ-ի դիմաց, Ապարանի ջրամբարում` 33 մլն խմ ` նախորդ տարվա 90 մլն խմ-ի դիմաց: Ընդ որում, Ապարանի ջրամբարի ջուրն օգտագործվելու է միայն տարածաշրջանի գյուղերի խնձորի այգիների ոռոգման համար և այլ նպատակով չի տրվելու: Այս տարի ավելի շուտ` մայիսի 2-ից է սկսվել Սևանից ջրառը, մինչդեռ սովորաբար լճից ոռոգման նպատակով ջուր վերցվում էր հունիսի կեսերից: Ըստ Ա. Գևորգյանի` ջրի նույն պահանջարկի պահպանման պարագայում Սևանից լրացուցիչ քանակություն վերցնելու անհրաժեշտություն կառաջանա: Այդ իսկ պատճառով ՏԿՆ Ջրային տնտեսության պետական կոմիտեն նախատեսում է հանդես գալ Սևանից ջրբացթողումը 2012թ-ին մինչև 320 մլն խմ դարձնելու առաջարկով:
Ա. Գևորգյանը առանձնահատուկ կարևորել է նաև համակարգի անխափան գործունեության ապահովումը: Նա մասնավորպես ընդգծել է ձևավորված հասույթների դիմաց գանձումների ամբողջական ապահովումը, ինչը թույլ կտա խուսափել այլ ենթակառուցվածքների, մասնավորապես, էներգահամակարգի հետ կապված հնարավոր խնդիրներից: Նշվել է, որ թեև հավաքագրումների այս տարվա ծավալը, նախորդ տարվա նույն ժամանակահատվածի համեմատ, մոտ 100 մլն դրամով ավելի է, սակայն դա հասույթի ընդամենը 39 տոկոսն է կազմում: Միաժամանակ Ա. Գևորգյանը ՋՕԸ-երի ղեկավարներին հորդորել է բացառել ընկերությունների նախահաշիվներում նախատեսված ծախսերի ավելացումը:
Համակարգի արդյունավետ գործունեությունը Ա. Գևորգյանը կարևորել է նաև ոլորտում ենթակառուցվածքների բարելավմանն ուղղված ծրագրերի շարունակականության տեսանկյունից: Նա նաև տեղեկացրել է, որ քայլեր են ձեռնարկվում ջրամբարային շինարարության ակտիվացման ուղղությամբ` հաշվի առնելով երկրի համար ջրային պաշարների կուտակման կարևորությունը:
ՏԿՆ Ջրային տնտեսության պետական կոմիտեի նախագահ Անդրանիկ Անդրեասյանն իր հերթին ՋՕԸ-երի ղեկավարներին հորդորել է առաջնային ուշադրություն դարձնել ֆինանսական կայունության և կարգապահության խնդիրներին` շեշտելով, որ համակարգերը պետք է աշխատեն կրեդիտորական պարտավորություններ չձևավորելու սկզբունքով:
Խորհրդակցության ընթացքում իրենց տարածքներում առկա խնդիրները ներկայացրել են նաև ՋՕ ընկերությունների ղեկավարները:
